Sabda, 26. otober 2024

Al falâ ma le gol por la deventa. Le resultat de parité é bindebó strent por la Val Badia.

Cun n cîl curí sura la plaza dal palé da La Ila à metú man la nona partide de chesc campionat de 3a. categoria. Dô les ultimes bunes prestaziuns pon sé aspeté val sodesfaziun por la scuadra y i fans. É propi en sció era stada, cun n punt por om se rovada la partida combatöda sportivamenter.

Danter i spetadus él ince Luca "Pizzo" Pizzinini che tl ultima partida à albú n burt inzident ala ciaidla. Ti aodun na buna varijun y intratant pol gní à fá le "tifo" por sú compagns. Al 5' menüt él na trata da dalunc de Verginer te porta. Le un dl Falzes para ia por tera te dui iadi. Dô da 9' de jüch atoca le set Demetz la stangia de porta sön na bela trata, magari da vintecinch metri. Al 21ejim robat Ferdigg cun i pügns demez püch dan porta na trata rebatöda danter n só defensur y n' atacant puster. Dô da 26' menüc ciafa Fistill na trata te aria, mo le portier puster é ascvelt i blocheia dan i pîsc dl ladin. Al 36' él na puniziun secia dl cinch Schwarz te porta, le un ladin para ia por tera. Da na trata da ciantun de Valentini al 42ejim, devieia Barbolini te porta de cé. Le portier dl Falzes para alt.
Tl mete man dl secundo temp metel ince man da plovei. Al 47' menüt röia te aria bel sú Stampfer, püch denant che al pois trá te porta vegnel de püch anticipé da en defensur. Al 55' de jüch röia ala trata sú dan porta Fistill, cun na gran rebatöda Calderone dij de no al gol. Dô da 62' menüc da na trata da ciantun él dös deviaziuns te porta de cé, la pröma de Mayr rebatöda y la secunda de Barbolini abinada püch dan la ligna. N menüt dedô da na trata da ciantun, devieia n' atacant de cé püch fura porta ladina fora. Al 66ejim él na gran trata de Valentini püch dan la gran aria. Á portier bele batú robat la trata sön la stangia de porta. Ciamò en iade desfortuné é le nú dl VB al 78' menüt. Cun la porta öta atocha süa trata la pert alta dl pé de porta. Tl recuper al 95' de jüch él indolater begn trei trates te porta dl Falzes. Dötes trei à val moda rebatödes demez dai defensurs.
N gran mirit che le resultat é resté sön le 0 a 0 ti vá al portier Calderone, che á propi albú süa "giornada". Signè goi é le plú gran "problem" dla VB, propi te chesta partida cun tan de bunes ocajiuns. Te chesta partida esun begn merite düc i trei punc, cun mâ un en punt pon ester ma mez cuntenc. La prestaziun y le jüch é stá bugn. Porchel n "brau" à düc.

ACD Val Badia - ASD Pfalzen: 0 - 0

Formaziun dla Val Badia: 1.Rene Ferdigg, 2.Alex Miribung, 3.Thomas Verginer, 4.Max Videsott, 5.Matteo Ploner, 6.Florian Barbolini, 7.Tobias Fistill (dal 62' Marc Mary), 8.Simone Dallapiazza (capitan), 9.Luca Valentini, 10.Emanuele Sintoni, 11.Alex Stampfer.

Alenadú: Hanspeter "Pücia" Graffonara.

Proscima partida:  en doman sabeda ai 2 de november 2024 da les 14:30 sön la plaza da Niederdorf cuntra le Alta Val de Puster.