Sabda, 05. otober 2024
Finalmënter!
N sabeda domisdé dales 15:30 él gnü soghé la partida de campionat de 3^ categoria danter l’ ACD Val Badia y l’ ASV Prettau. Al é sté na partida olaché la Val Badia á finalmënter soghé bun y se á tigní i 3 punc te ciasa.
La partida mët man y al 10^ á Kastlunger la pröma ocajiun dla partida cun na bela trata dô n passaje de Pizzinini, mo l’ palé vá sura porta fora y l’ portier n mëss fá nia. Al 19^ porta Denicolo inant i ladins cun na bela trata che röva te porta, mo l’ arbiter sciüra n forajüch y ne ti conzed nia l’ gol. 3 menüc dedô á incé l’ Prettau la pröma ocajiun dla partida cun na bela trata dal limit dl’ area che vëgn parada cun n bel intervënt de Ferdigg. Al 35^ ti é spo la Val Badia finalmënter sön l’ 1-0 y chësc iade ne él nia forajüch. Valentini salta jö sön la fascia y mët ité t' area n bel cross olaché Kastlunger abina l’ palé de cé y le tira te porta. Y 2 menüc dedô él indô Kastlunger che röva jö sön la fascia, vá cuntra porta y lascia pié ia na bela trata cuntra porta che ne ti lascia degöna poscibilité al portier y porta la Val Badia sön l’ 2-0. Dô chësta aziun ne sozedl nia plü tröp y insciö sciüra l’ arbiter al 47^ la fin dl’ pröm tëmp dô 2 menüc de recuper sön l’ resultat de 2-0.
Tl secundo tëmp á indô la Val Badia por pröms na ocajiun cun n bel cross te area al 50^ che vá fora por döta l’ area mo degügn l’ abina por l’ trá te porta. Al 68^ vëgn Valentini lancé cun n bel passaje filtrant cuntra porta, mo Valentini impede fá ciamó n pêr de metri tirl atira y insciö pó l’ portier ti ciaré pró sciöché ara brodora dlungia pé de porta ia y fora de ciamp. 3 menüc dedô ti é i ladins cinamai da sé porté sön l’ 3-0 cun n gol saurí cun la porta cuaji öta de Valentini dô n bel cross de Kastlunger. Al é dër n bun dé por la scuadra de ciasa. Al 75^ á l’ nü sogadú dla partida Verginer na gran ocajiun sön i pisc, mo süa trata dal limit dl’ area vëgn parada te ciantun dal portier aversar. Püch dan la fin, al 94^, á ciamó Dallapiazza na grandiscima ocajiun canch al vëgn lancé sú cuntra porta, mo l’ portier vëgn fora a ti stlü l’ spidl de porta cun n gran intervënt y Dallapiazza ti tira ados l’ palé. N menüt dedô sciüra spo l’ arbiter incé la fin dla partida sön l’ resultat de 3-0 por i ladins. Al é sté na partida olaché la Val Badia á soghé de tröp miú co l’ aversar y al é n resultat merité che es magari podü ester ciamó plü alt.
ACD Val Badia - ASD Predoi: 3 - 0
Formaziun ACD Val Badia: 1. Ferdigg Rene, 2. Miribung Alex, 3. Barbolini Florian (cherta cöcena), 4. Ploner Matteo, 5. Videsott Max, 6. Pizzinini Luca, 7. Unterweger Joel (dal 63^ 13. Clara Fabian), 8. Denicolo Davide (dal 86^ 18. Crepaz Luca), 9. Valentini Luca (dal 72^ 15. Verginer Thomas), 10. Dallapiazza Simone, 11. Kastlunger Mattia (dal 78^ 17. Pizzinini David).
Alenadú: Graffonara Hanspeter.
Proscima partida: La proscima partida vëgn sogada n sabeda, ai 12 de otober, dales 15:30 cuntra l’ ASC Jergina Amateure sön l’ ciamp dal palé "Pradel" a San Martin.