Domënia, 21. mà 2023
Pordüda meritada
N domënia domisdé él gnü soghé te n bun cialt sön l’ ciamp "Pradel" da San Martin la penultima partida de campionat de 3^ categoria danter l’ ACD Val Badia y l’ ASC Jergina Amateure.
La partida mët man y al 11^ pó l’ publich bel odëi la pröma ocajiun. N aversar röva cun l’ palé dan porta y prô la trata che vá a sbaté cuntra l’ pé de porta. Al 18^ prô l’ Jergina indô da se porté in vantaje cun na trata de puniziun che vëgn parada da Ferdigg. Al 19^ él incé i ladins che á na ocajiun cun Dallapiazza che ti sciampa te n pröm momënt al portier y vá cuntra porta. Mo l’ portier ti é ciamó da recuperé al ultim y tigni sö l’ palé. Al 24^ á la Val Badia ciamó na ocajiun cun na trata de puniziun dal limit dl’ area aversara, mo chësta vëgn parada dal portier. 4 menüc dedô ciafa l’ Jergina na trata de puniziun dlungia porta ladina. Sön chësta trata de puniziun pëiel ia n bel cross che vá sura Ferdigg fora y ti röva sön i pisc a n sogadú todësch che mëss ma plü la trá te porta por l’ 0-1. Dô l’ pröm gol dla partida ne sozedl nia plü tröp y insciö él l’ arbiter che sciüra la fin dl’ pröm tëmp al 46^, dô n menüt de recuper.
Al passa 7 menüc dl’ secundo tëmp y l’ Jergina se porta sön l’ 0-2 cun na bela aziun che porta l’ atacant a ruvé sú t’area dan Ferdigg. Dailó ne él plü degun problem le trá te porta. 2 menüc dedô, al 54^, él l’ arbiter che sciüra n fal t area ladina y dô chësc se porta l’ Jergina cinamai sön l’ 0-3 cun na bela trata dai önesc metri che röva sot l’ incrujada di lëgns de porta olaché Ferdigg ne pó fá nia. Al 68^ ciafa l’ Jergina ciamó na ocajiun cun na bela trata de n sogadú dal limit dl’ area che vá de püch dlungia ia. Al 76^ él i todësc che á ciamó l’ ultima ocajiun dla partida cun na aziun personala dl’ atacant che röva t area y tira bass, mo Ferdigg é reatif y para la trata. Dô chësta aziun ne sozedl nia plü tröp te ciamp. Al 90^ él l’ arbiter che dá ciamó 4 menüc de recuper y sciüra spo la fin dla partida al 94^. Al é ste na partida che l’ Jergina se á merité da davagné. La Val Badia á metü ite n gran impëgn por düc i 90 menüc mo al ne á nia basté cuntra na scuadra plü sterscia y asvelta.
ACD Val Badia - ASC Jergina Amateure: 0 - 3
Formaziun ACD Val Badia: 1. Ferdigg Renè, 2. Miribung Alex (dal 62^ 13. Graffonara Simon), 3. Barbolini Florian, 4. Videsott Max, 5. Fersuoch Kewin, 6. Ploner Matteo, 7. Bernardi Luca (dal 62^ 15. Mayr Marc), 8. Stampfer Alex, 9. Pizzinini Luca (dal 75^ 20. Valentini Luca), 10. Dallapiazza Simone (dal 62^ 17. Pizzinini David), 11. Pellegrini Davide.
Alenadú: Crepaz Gianni.
Proscima partida: La proscima partida vëgn sogada n domënia, ai 28 de má, dales 16:00 cuntra l’ ASV Prettau sön l’ ciamp dal palé "Pradel" a San Martin.