Sabda, 13. mà 2023
Na partida dër ria
N sabeda, ai 13 de má, él gnü soghé la partida de campionat de 3^ categoria danter l’ ASV Dietenheim y l’ ACD Val Badia sön l’ ciamp dal palé da San Laurënz deache l’ ciamp da Dietenheim é indisponibl.
La partida mët man cun n gran ecuiliber te campo y al 5^ pó l’ publich odëi la pröma ocajiun dla partida. Dô n bel cross t area prô n sogadú todësch da trá te porta, mo l’ palé vá de püch dlungia ia. Al 15^ ti garetl l’ 1-0 ai todësc che, dô n fal de n defensur ladin, ciafá l’ palé, prô la trata da dalunc y atoca l’ incrujada de porta. Al 22^ él l’ Dietenheim dan porta ladina cun na bela trata de cé che vëgn tignida sö da n intervënt de Frenademetz. Al 30^ él indô l’ Dietenheim che á na ocajiun cun na bela trata sön porta, dô n cross, che vá de püch dlungia ia. N menüt dedô röva i todësc indô cuaji al gol cun na bela trata de cé dô na trata dal ciantun, mo chësc iade él Frenademetz che para. Al 38^ él ince la Val Badia che á na ocajiun cun na bela trata da fora de Crepaz che vá de püch sura fora. Al 45^ él l’ Dietenheim che se porta sön l’ 2-0 cun n gol de cé dô na trata dal ciantun y n menüt dedô él incé la Val Badia che fej n gran gol cun na trata dal limit dl’ area de Videsott che vá te porta. 2-1. Dô chësta aziun él l’ arbiter che sciüra la fin dl’ pröm tëmp sön l’ resultat de 2-1 por i todësc.
L’ publich dla partida mëss aspeté l’ 60^ por odëi la pröma ocajiun dl’ secundo tëmp canché n sogadú aversar prô la trata de cé sön na trata dal ciantun, mo degun problem por Frenademetz. Al 62^ él incé la Val Badia che á la pröma ocajiun dl’ secundo tëmp cun Dallapiazza, mo süa trata é debla y vëgn parada dal portier. Al 66^ él Pizzinini che röva jö sön na pert y mët l’ palé t area olaché Crepaz prô la trata mo al ne l’ abina nia. L’ palé röva sön i pisc de Stampfer che prô incé la trata, mo chësta vá dlungia porta ia. Al 76^ ti é ciamó l’ Dietenheim da se porté sön l’ 3-1 definitif. Ploner M. passa zoruch l’ palé al portier y chësc prô da le trá sö, mo l’ palé röva sön i pisc de n atacant aversar che le tira te porta. Dô chësta aziun ne sozedl nia plü tröp y insciö él l’ arbiter che sciüra la fin dla partida al 95^, dô 5 menüc de recuper. Al é sté na partida olaché l’ ACD Val Badia á fat l’ poscibl y á combatü cina la fin cuntra n aversar plü sterch.
SVD Dietenheim/Aufhofen - ACD Val Badia: 3 - 1
Formaziun ACD Val Badia: 1. Frenademetz Denis, 2. Graffonara Simon, 3. Pellegrini Davide (dal 55^ 15. Barbolini Florian), 4. Crepaz Omar (dal 81^ 14. Sintoni Emanuele), 5. Fersuoch Kewin 6. Ploner Matteo, 7. Pizzinini Luca, 8. Stampfer Alex (dal 85^ 17. Mayr Marc), 9. Pizzinini David (dal 85^ 13. Ploner Alexander), 10. Dallapiazza Simone (dal 66^ 18. Bernardi Luca), 11. Videsott Max.
Alenadú: Crepaz Gianni.
Proscima partida: La proscima partida vëgn sogada n domënia, ai 21 de má, dales 16:00 cuntra l’ Jergina Amateure sön l’ ciamp dal palé "Pradel" a San Martin de Tor.