Domënia, 24. merz 2019
En bel segn de vita da pert dla Val Badia, che é jöda à davagné te ciasa di secundi dl Gais
Cun indô deplú novites tla formaziun por na gauja o l'atra, mess le alenadù Curti chierí da churí dotes les posiziuns te ciamp. La scuadra à combatú dal mete man, senza tema y meton in dificulté i secundi che pê t' un moment de dificulté. Sön la gran plaza da Gais petel jö en gran soredl tl mete man.
Al 19^ menüt tira Felder da buna posiziun dlungia pé de porta fora. Al 21ejim da na puniziun röia dan porta le curan al sis Niederkofler che tira rodunta fora püch dan porta. Do da 24^ de jüch él na bela aziun cun tröpes pasades danter i sogadus dla VB. Sön la passada t' aria vegn de püch anticipé Matti Stampfer dal portier dl Gais. Al 41^ menüt röia ala trata te porta Granruaz da dan aria, le un Mair para ia por tera. Do da 44^ de jüch vegn da na pert jö Kastlunger che salta deblú aversârs y bel jö da pé crosseil ite a mesa aria. Chiló röia le pröm ala deviaziun Olex Stampfer che splundra te porta por le vantaje ladin dl 0 a 1. Tl pröm menüt dl secundo temp ciafa bele Ferdigg da fá meson gní fora dla gran aria à trá demez n palê sön na posiziun de fora dl jüch bunamenter nia sciurada. I pustri fej segn tröp druch por rové al pêr. Al 55^ menüt anticipeia net t' aria Liotto te ciantun püch dan le sú set Reichegger, che se fej mé. Al 61^ por n bur fal sön le capitan Stampfer püch dan aria ciafa la VB na puniziun. La trata bassa dl medemo roda dô le mür ite y vegn bun parada dal portier puster. Do da 73^ menüc tira le cinch Kröll na puniziun te porta. Püch dan pé devieia le un ladin te ciantun. Dui menüc dedô tres cun trata dl cinch dl Gais para te dui temps püch dan le pé de porta Ferdigg la puniziun. Al 87ejim tira tres le cinch Kröll n' atra puniziun te porta in chesc iade alta, Ferdigg salta sö y la para sigú. I pustri é ma stá prigorusc sön les punizuns, senza à la defensciun tigní bun. I le "duel" danter le spezialist dles puniziun Kröll y le verdaporta Ferdigg é jú davagné dal un ladin. Na bela y sana deventa che lascia speré bun y fêj n vare sö pert tl tlassament. I dá tröp moral propi dan le derby cuntra le Mareo.
FC Gais - ACD Val Badia: 0 - 1
Formaziun dla Val Badia: 1.Rene Ferdigg, 2.Dylan Liotto (dal 58^ Florian Barbolini), 3.Mattia Kastlunger, 4.Cristian Granruaz, 5.Samuel Vittur, 6.Andrea Conrater, 7.Alex Felder, 8.Alex Stampfer (dal 89^ Christian Azzolini), 9.Roberto Del Negro, 10.Matthias Stampfer (capitan), 11.Marc Mayr (dal 77^ Luca Bernardi).
Alenadù: Cristian Curti.
Gol por la Val Badia: 44^ Alex Stampfer
Proscima partida: Domenia, ai 31 de merz 2019 da les 16.00 le derby cuntra le Mareo sön la plaza da La Ila.