Situaziun particolara dl' US Alta Badia

L'US Alta Badia é gnüda metüda sö cun l'intenziun de eliminé l'ćiampanilism sportif che á despartí dî ala lungia i paisc dla val Badia. De un n vers pon sënz'ater di che chësc é garatè, mo d'atra pert mëssun inće udëi ite les dificoltês particolares de na te'sozieté.

Dal mumënt che ala tol ite sugadusc de plö paisc, suzedela che degügn ne s'identifichëia dldüt cun chësta scuadra, che n'á insciö nia l'inom y l'prestisc de na lia de paisc sciöche pur ejëmpl i stüdafüć, la müjiga y i.i.

An mëss inće tigni cunt che nosta lia n'á nia chëla crëta che les sozietês dal palon á in general (l'jüch dal palon é l'sport plö slargé fora, sintí y pratiché dl monn), ćiudí che l'palon é chiló da nos ćiamò massa jonn; al n'á p.ej. nia ćiamo chëla tradiziun che i ski á.

Al é bel da cunstatè che propi i jogn á tröp interesc pur chësc sport, n interesc che contrastëia gunot con la mentalité plötosc stlüta de sü geniturs.

Surafora mëssun spo ćiamò tigni cunt dl clima y chilò ruvunse spo a nosc gran problem che e chël de pratiché l'jüch dal palon a n'altëza de 1500 metri. Nösc campionać vëgn sugá danter setëmber y nuvëmber y merz y má dl ann dô; i problems liá a chësc calënder é purchël saurisc da udëi ite. Tröpes partides mëss gni sugades fora de ćiasao rinviades y ći che ćiamò peso, tröc alenamënc mëss gni fać te palestra. Sughé al palon te nösc raiuns ó purchël di ji cuntra la natüra y fà de gran sacrifizi. 

Sce chësc é de un n vers nosc maiú problem, pon dí dl ater vers che al se sbürla da arjunje tres de mius resultać, ćiudí che chisc vê pur nos deplö che pur na scuadra che süga te n clima plö ćialdin.

N ater problem é chël dla saisonn; tröc sugadusc é a laurè y ai á purchël dificoltës da tó pert regolarmënter ai alenamënć y dè düt ći che ai foss bogn.

N ultimo problem é chël che nia düc i paisc dl'Alta Badia á ćiamp dal palon ulá che i jogn pò mët man de se dè jö cun chësc sport. Nosta sozieté á purchël tres purvè de sensibilisé i cumuns sö la nezescité de arjigné inće a Calfosch, S. Ćiascian y Badia n ćiamp dal palon.