Sabda, 25. otober 2025

Al ti es orú en pú deplú convinziun por ti ester ai averârs nia tan stersc.

Sot n cîl corí él gnú soghè la nona partida de campionat. Por chesta partida él gnú cherdé à defene la porta dla VB Altin. I atri trei portiers dla scuadra: Ferdigg, Frenademetz y Kastlunger nê degügn á disposiziun. Porchel n gran "giulan" á Altin por só aiüt.

Bele da mete man drücha chi da Mühlwald cun convinziun. Al 1' menüt mess bele Altin devié sön süa man derta na trata te ciantun. Dô da 19' de jüch él n diagonal de Valentini che röia bass dlungia pé de porta fora sön la man derta dl un puster. Al 29' menüt röia te porta na trata cross che Altin abina mó ti scampa sura fora. Dan le secundo pé él bel sú le önesc M.Gasser che devieia te porta por le 0 a 1. N menüt dedô él na trata de Sintoni che röia te porta, le un Knapp para bel alt sot la stangia.
Dô da 44' de jüch toma le 0 a 2. En toch fora dla gran aria lascia pié ia Niederbrunner na trata bassa che röia sön la man derta de Altin dlungia pé bass ite te rei. Al 56ejim röia ince le terzo gol dl Mühlwald. Na trata de puniziun en toch dan aria vegn trata te porta. Altin la robat cun i pügn jó sön le spiné dl nú H.Oberhollenzer y le palé coghera te porta. Segn vegn le resultat begn en pú posoch, 0 a 3. Dui menüc dedô röia sú dan porta ala deviaziun de cé Valentini che devieia sura porta fora. Al 60' de jüch tira le diesc ladin na bela puniziun dá dan aria te porta. Le portier Knapp fej na gran deviaziun püch sot la stangia da na pert fora. Dô da 66' menüc röia S. Clara püch dan porta, mó le "un" le anticipeia devian dan pé fora te ciantun. Al 71ejim röia sú ala trata da n cross dan porta Denicolo, chesta é depla y vegn para alta da sigú Knapp. Dô da 76' menüc röia na trata t' aria dl sedesc Schneider bassa nia de tröp dlungia pé de porta fora, sön la man ciampa de Altin. Al 79' de jüch él ciamò l' ultima ocajiun ladina por rové almanco á n gol. La trata te porta dl nú dla VB vegn da impröma deviada da n defensur cuntra porta y spó dal portier da na pert fora.
Gnanca dl gol dla "bandira" ne anse la sodesfaziun, dô deplú de bunes ocajiuns da gol. Cun chesta pordöda tomun jó al diejimo post te tlassament. Te val pert dla partida al falé la derta convinziun, cosa ché chí dl Mühlwald á metú te ciamp tröp de plú. Le proscim fin dl edema él na palsa tl campionat de 3a. Categoria, n sabeda ai 8 de november vara spó inant cun na partida fora de ciasa.

ACD Val Badia - SSV Mühlwald: 0 - 3

Formaziun ACD Val Badia: 1.Alla Altin, 2.Thomas Verginer (dal 65' Davide Denicolo), 3.Alex Miribung, 4.Simon Graffonara, 5.Max Videsott, 6.Simone Dallapiazza (capitan) (dal 84' Michele Tagliafierro), 7.Emanuele Sintoni (dal 81' Stefano Sintoni), 8.Fabian Clara, 9.Simon Clara, 10.Luca Valentini, 11.Marc Mayr (dal 70' Tobias Fistill).

Alenadus: Albert Castlunger y Patrick Costabiei.

Proscima partida:  en sabeda ai 8 de november 2025 da les 14.30 sön la plaza da Feldturns cuntra le Feldturns "B".