Domënia, 18. mà 2025

Tigní bun bot cun la cuinta dl tlassament, tl temp surafora röia le merité  2 a 2

Té n domisdé bel cialt y sön le bel "tepich" dl Pradel él gnú soghè la pen ultima dl campionat. Che se röia la proscima domenia. Al é ste na partida entersanta y rica de goi. Tl pröm temp à la VB fat le jüch cun deplú ocajiuns. Tl secundo à porvé chí dl Alta Val de Puster da sé davagné la partida. Mó la formaziun de Graffonara à combatú cina la fin abinan la parité y n bun punt.

Al 3' él na bel trata de F. Clara che röia dlungia pé fora. Dô da 8' de jüch röia na passada al sú S. Clara dan porta pustra, al salta en defensur y tira te porta. En secundo defensuré ciamò bun da robate demez le palé püch dan porta. Al 32ejim röia n cross de Valentini da na pert ite dan porta. Le un Sinner para ia por tera dan pé de porta. Cun la pröma trata te porta al 38' menüt toma le vantaje por l' Alta. Na pröma trata te porta vegn rebatöda da Kastlunger, le ot Sinner la abina y da püc vari la devieil te porta. Dô da 46' tl pröm temp tira le nú Oberkofler na bela puniziun zentrâla te porta. Le un dla VB à na gran reaziun y alza sura fora te ciantun.
Tl pröm menüt dl secundo temp él na punizun dla VB che vegn rebatöda dal mür. Le curan röia à Valentini bel sú da na pert dan porta, la trata röia mâ sön la rei defora. Dô da 65' de jüch röia le 1 a 1. Sön na passada de Sintoni t' aria, dô na bela aziun röia sön le palé Dalla Piazza che tira bel bass te porta dlungia le pé ite. Chiló ne röia nia le portier. Mo mâ trei menüc dedô röia le secundo vantaje di ghesc. Sön n' aziun asvelta di pustri röia le curan al bel sú dejnú E. Rienzner che bat le un ladin cun na trata bassa sön süa man ciampa. La reaziun dl ladins é buna, cun deplú ocajiuns arjomades. Mó Th. Sinner (joram dl conescú tenist Jannik) y süa buna defensciun tegn bot ai atacanc dla VB. Tl terzo menüt dl temp surafora röia le 2 a 2. Valentini se porta inant le palé dan porta y lascia pié ia na bela trata che roda dô le portieri ia dlungia pé de porta, por la parité. La ligreza é grana de avei ciamò abine le punt. La proscima y ultima sará cuntra le Raas, che mess davagné cuntra la VB por speré de fá le salt só te secunda Catergoria. Al sará da se aspeté na gran batalia.

ACD Val Badia - AFC Hochpusteral: 2 - 2

Formaziun ACD Val Badia: 1.Alex Kastlunger, 2.Florian Barbolini, 3.Armin Plazza (dal 76' Lukas Pramstaller), 4.Simone Dalla Piazza, 5.Max Videsott (capitan), 6.Alex Miribung, 7.Fabian Clara (dal 72' Joel Unterweger), 8.Davide Denicolo (dal 76' Tobias Fistill), 9.Simon Clara, 10.Luca Valentini, 11.Emanuele Sintoni.

Alenadù: Hanspeter "Pücia" Graffonara.

Goi por la Val Badia: 65' Simone Dalla Piazza, 93' Luca Valentini.

Proscima Partida:  en domenia ai 25 de mà 2025 da les 15:30 sön la plaza da Raas cuntra le Raas.