Sabda, 03. mà 2025

Degun mioramënt incër la fin dl campionat

Dô la gran purdüda cuntra i amatörs da San Iöre l’ultima edema speran da se trá sö le moral cuntra Uttenheim, mo ara ne é nia jüda coch an sla aspetâ

In sabeda ai 3 de ma él gnü sughé por le pröm iade chësc ann sön le ciamp "Pradel" a San Martin. Dan la partida se aspetan che la formaziun Uttenheim foss n aversar olache ara foss jüda da purté a ciasa punc, mo baldi ne á la prestaziun dla Val Badia nia basté.
Bele do dui menüc de jüch röia n atacant aversar a na bela trata, che le un Ferdigg para sigü. Al 12’ menüt tomel ince bele la pröma ghela: Stampfer é sforzé da mëte jö le 8 Unterkircher, che podô jí sú cuntra porta. Dô na trata dal ciantun al 15’ menüt toma n aversar te area, l’arbiter ne á degun dübe y sciüra: trata dai önesc metri por le Uttenheim. Le 6 Niederkofler se tol la responsabilité y tira a man dërta y bat Ferdigg. 1-0 por le Uttenheim. Al é bele le terzo rigore de cuntra te dös partides. La pröma ocajiun di ladins vëgn al 33’ menüt, Valentini bat na puniziun che röva sön le pe a Mayr che tira de pröma, le palé vá dlungia porta ia. Dan la fin dl pröm tëmp él Ploner y le 7 puster che salta adöm cun le ce, da mëte man s’an dé na gran spurdüda, mo por fortüna á trami i sogadus pudü sughé cina la fin. Al se röia le pröm tëmp cun püces ocajiuns da trames les perts. Sciode pur le fal te area scinché ai aversars, che á purté al gol. Le secundo tëmp él le Uttenheim che mët man bun: sön n cross ne él degügn che tol le palé, al rembalza dan Ferdigg, che é ciamó bun da le devié sura porta fora. Al 52’ menüt él le capitan dl’Uttenheim Niederkofler che atoca le palé de ce do na buna trata dal ciantun, indô é Ferdigg bun da devié la cogura sura porta fora cun n gran rifles. Dô n’atra trata dal ciantun al 63’ menüt toma spo le 2-0. Al é ciamó n iade le capitan di gesć che röia bel su a na trata che bat del portier dla Val Badia. Al 80’ vëigun la pröma bela aziun dla Val Badia. Valentini pëia ia da mez ciamp cun le palé, n püch dan l’area la dal a Pizzinini che da buna posiziun ne é nia bun da tra sön porta. Dô da chësta ocajiun ne suzedel nia plü tröp, la Val Badia perd indô dô na prestaziun che ne é nia al altëza dles aspetatives che an â dan le mëte man dla partida.

ACD Val Badia - ASV Uttenheim: 0 - 2

Formaziun Val Badia: 1. Ferdigg Rene, 2. Ploner Matteo, 3. Stampfer Alex, 4. Valentini Luca, 5. Dallapiazza Simone (dal 57’ Sintoni Emmanuele), 6. Miribung Alex, 7. Unterweger Joel (dal 85’ Ploner Alexander), 8. Videsott Max, 9. Mayr Marc (dal 85’ Pescosta Andrea), 10. Clara Fabian (dal 85’ Barbolini Florian), 11. Fistill Tobias (dal 45’ Pizzinini David).

Alenadú: Hanspeter Graffonara.

Proscima partida: cuntra Falzes, en sabeda ai 10 de ma, sön le ciamp dl sport a Falzes.