Sabda, 02. novëmber 2024

Degöna prestaziun, degun resultat

N sabeda domisdé dales 14:30 él gnü soghé sön l’ ciamp dal palé da Niederdorf la partida de campionat de 3^ categoria danter l’ AFC Hochpustertal y l’ ACD Val Badia. Al é sté na partida olaché l’ aversar é sté de tröp miú y ne ti á lascé cuaji degönes poscibilites ai ladins.

La partida mët man y al 6^ pon bel odëi l’ pröm gol dl’ Hochpustertal cun na trata dl’ atacant bel sú dan Kastlunger che vá te porta por l’ 1-0. Al 22^ á i padruns de ciasa indô na poscibilité cun na bela trata cuntra porta, mo Kastlunger deviëia l’ palé sura porta fora te ciantun. 5 menüc dedô, al 27^, se porta l’ Hochpustertal spo sön l’ 2-0 cun na bela trata dal limit dl’ area che vá dlungia Kastlunger ia dan co jí te porta. Al 38^ á ciamó i todësc na ocajiun cun na trata da fora d’ area dl portier che vëgn parada cun n bel intervënt da Kastlunger. Dô chësta aziun ne sozedl plü nia y insciö sciüra l’ arbiter la fin dl pröm tëmp al 47^, dô 2 menüc de recuper, sön l’ resultat de 2-0.
L’ secundo tëmp mët man cun na ocajiun por i ladins cun Valentini che prô la trata cuntra porta, mo l’ palé vá sura fora. Al 54^ röva l’ Hochpustertal al limit dl’ area ladina cun na bela aziun y tira cuntra porta, mo l’ palé ne vá nia sön spidl de porta. Al 56^ á i padruns de ciasa indô na ocajiun cun na trata de puniziun dal limit dl’ area. Al pëia ia n strisciun bass y Kastlunger, cun n gran rifless, se sposta adora assa y para la trata. Al 60^ prô n sogadú aversar na trata bassa da dalunc che ti sciampa al ultim fora dles mans a Kastlunger y röva te porta por l’ 3-0. L’ portier ladin á albü tröpa desfortüna te chësta ocajiun. 6 menüc dedô á incé la Val Badia na ocajiun cun na trata de puniziun de Valentini che röva te ciantun de porta, mo l’ portier é arjigné cá y salva süa porta. 2 menüc dedô á Valentini ciamó na ocajiun cun na trata püch dan porta che röva de dër püch sura fora. Incö ne ora nia ester. Al 76^ fej i padruns de ciasa incé ciamó l’ cuarto gol cun na trata de cé dô n bel cross te area sön na trata de puniziun. 4-0. Al 90^ dá l’ arbiter ciamó 2 menüc de recuper y insciö sciürl al 92^ la fin dla partida. Al é sté na partida sogada trancuilamënter dala scuadra de ciasa che ne á mai albü problems cuntra na Val Badia sënza idees de jüch.

AFC Hochpustertal - ACD Val Badia: 4 - 0

Formaziun ACD Val Badia: 1. Kastlunger Alex, 2. Miribung Alex (dal 83^ 17. Pramstaller Lukas), 3. Verginer Thomas, 4. Videsott Max, 5. Ploner Matteo, 6. Barbolini Florian (dal 85^ 19. Plazza Armin), 7. Fistill Tobias (dal 46^ 15. Mayr Marc), 8. Dallapiazza Simone, 9. Valentini Luca, 10. Sintoni Emanuele, 11. Clara Fabian (dal 46^ 13. Unterweger Joel).

Alenadú: Graffonara Hanspeter.

Proscima partida: La proscima partida vëgn sogada n sabeda, ai 09 de novëmber, dales 14:30 cuntra l’ ASV Raas sön l’ ciamp dal palé da La Ila.