|
 Sabda, 12. otober 2024
Ara stënta!
N sabeda domisdé dales 15:30 él gnü soghé la partida de campionat de 3^ categoria danter l’ ACD Val Badia y l’ ASC Jergina Amateure. Al é sté na partida olaché i ladins é stá bugn da fá püch dandadöt dan la porta aversara.
La partida mët man cun la pröma ocajiun por la Val Badia al 13^ canché Valentini lascia pié ia na trata da fora d’ area che vá de n pêr de metri sura porta fora. La proscima ocajiun pó l’ publich odëi al 33^ canché l’ Jergina Amateure mët n bel cross te area sön na trata de puniziun. Sön chësc cross salta n sogadú sö de cé y tira l’ palé te porta por l’ 0-1. Ferdigg ne pó fá nia. Al 43^ röva l’ Jergina Amateure, dô na bela aziun, al limit dl area ladina cun n atacant che lascia pié ia na trata bassa che vëgn salvada da Ferdigg cun n bel intervënt. Dô chësta aziun ne sozedl nia plü tröp y insciö sciüra l’ arbiter la fin dl pröm tëmp al 45^ sön l’ resultat de 0-1.
L’ secundo tëmp mët man mal por la Val Badia cun Ploner che ti röva ados a n atacant te area y l’ arbiter sciüra na trata dai önesc metri. La trata spiazëia Ferdigg y porta la scuadra todëscia inant de dui goi. Al 54^ ciafa Verginer l’ palé te area y prô la conclujiun cuntra porta, mo l’ palé vá de püch dlungia porta ia. Dui menüc dedô él incé indô l’ Jergina Amateure che á na ocajiun cun na trata dal limit dl’ area che vëgn tigní sö te na manira sigüda da Ferdigg. Al 61^ mët Verginer n bel cross bass te area por Costner che ne l’ abina de püch nia. Sön la rebatöda tira Verginer sön la traversa de porta, mo al é in forajüch. Al 77^ sé porta i todësc incé sön l’ 0-3 cun na bela trata dl’ atacant sön l’ pröm pé de porta. Al ê a püc metri dan porta bel sú sënza degun defensur inciaria. Al 81^ prô l’ Jergina Amateure na trata da dalunc. Sön chësta trata é Ferdigg massa fora de porta y insciö vá l’ palé sura vël fora dan co ruvé te porta por l’ 0-4. N menüt dedô prô ciamó n iadé la Val Badia da segné cun Valentini che vëgn lancé cuntra porta y prô la trata dan l’ portier, mo chësc salva süa scuadra cun n gran intervënt cun les iames. Dô chësta aziun ne sozedl nia plü tröp y insciö sciüra l’ arbiter la fin dla partida al 93^, dô 3 menüc de recuper, sön l’ resultat de 0-4. Al é sté na partida olaché la Val Badia ne á mostré degönes idees, pücia concretëza y na condiziun che ne lascia nia speré bun.
ACD Val Badia - ASC Jergina Amateure: 0 - 4
Formaziun ACD Val Badia: 1. Ferdigg Rene, 2. Miribung Alex (dal 88^ 16. Fistill Tobias), 3. Stampfer Alex, 4. Ploner Matteo, 5. Videsott Max, 6. Pizzinini Luca, 7. Mayr Marc (dal 57^ 20. Costner Lois), 8. Dallapiazza Simone, 9. Valentini Luca, 10. Denicolo Davide (dal 57^ 15. Clara Fabian), 11. Verginer Thomas.
Alenadú: Graffonara Hanspeter.
Proscima partida: La proscima partida vëgn sogada n sabeda, ai 19 de otober, dales 15:30 cuntra l’ ASV Uttenheim sön l’ ciamp dal palé da Uttenheim. |
