Sabda, 25. mà 2024

An ess orú rové le campionat cun n bun resultat dan dal publich amich, mo ara na nia orú ester

L' ultima sabeda él gnú soghè sön la plaza da San Martin l' ultima partida de chesc campionat de 3a. categoria. Les condiziuns dl temp à ince lascé fá, la plaza "Pradel" é té der bunes condiziuns. Al é sté na partida plajora, che á ince fat odei val beles aziuns da n trames les perts. I pustri à albú val buna ocajun en plú, mó cun en pú de atenziun deplú esun podú se tigní en resultat de parité.

Al 6' menüt passa Valentini bass püch dan aria à Unterweger che tira de pröma te porta. Süa trata röia sot le piz alt de porta sön la man derta dl portier puster, che ne pó fá nia. N gran bel gol. Dô da 10' menüc él n scabla cunta scabla danter Verginer y n'atacant dl Falzes. Chesc toma jó sciöche n sach y le arbiter cunzed en önescmetri der, der bun marcié. Le cinch dl Falzes, J. Mittich splaza le un Ferdigg por la trata dl 1 a 1. Sön le resultat de parité se röia le pröm temp.
Bele dô da 49' de jüch toma le secundo gol por i pustri. Tun iade é n atacant puster bel sú te aria, ponsan te na scurada dl arbiter por en foradljüch, é tröc "chic". Mo le arbiter ne scüra nia y Oberschmied tira le palé dlungia le portier ia por le nú vantaje di pustri. La formaziun de Graffonara à na buna reaziun. Al 57ejim él na lungia trata dl capitan Ploner cuntra l' aria dl Falzes, Valentini abina le curan i cun furbizia fejel n bel "palonetto" sura le verdaporta (che é gnú fora) ite te porta öta por le
beliscim 2 a 2. Dô da 66' menüc salva Barbolini n palé püch dan la ligna de porta, à portier bele batú. Al 76' de jüch sön na dejatenziun ladina röia ala trata J. Knapp che apaiseneia avisa por le 2 a 3 por le Falzes. Ché pó fá festa y se porté à ciasa i trei punc. Chi de ciasa resta indô n' iade á mans ötes. En sció se sltüj jô le campionat 2023/24 cun n setim post y cun nia tröpes sodesfaziuns.
I punc é sedesc, früt de cinch deventes, na partida n partité y dedesc pordödes. Ara jará desigú da se milioré, la scuadra é jona i adora só temp por cresce. N dilan à düc y à odei indô da d' altonn.

ACD Val Badia - ASD Pfalzen: 2 - 3

Formaziun ACD Val Badia: 1.Ferdigg Rene, 2. Max Videsott, 3.Thomas Verginer, 4.Matteo Ploner (capitan), 5.Armin Plazza, 6.Joel Unterweger, 7.Fabian Clara (dal 68´ Alex Miribung), 8.Alex Stampfer (dal 90` Luca Crepaz), 9.Davide Denicolo, 10.Luca Bernardi (dal 46` Florian Barbolini), 11.Luca Valentini (dal 81` Denis Frenademetz).

Goi por la Val Badia: 6' Joel Unterweger, 56' Luca Valentini.

Alenadú: Hanspeter "Pücia" Graffonara.