Domënia, 19. mà 2024

L’ nia

N domënia domisdé él gnü soghé sön l’ ciamp dal palé da Wiesen la partida de campionat de 3^ categoria danter l’ ASV Wiesen y l’ ACD Val Badia.

La pröma ocajiun dla partida pó l’ publich odëi al 18^ canché l’ Wiesen ciafá na trata de puniziun dal limit dl’ area. L’ sogadú aversar tira y l’ palé röva naota sön pé de porta y spo te porta por l’ 1 a 0. Dui menüc dedô á Valentini na ocajiun cun na bela trata dal limit dl’ area cuntra porta, mo l’ portier para te ciantun. Al 34^ mëtl spo man l’ assediamënt dl’ Wiesen. N sogadú tira sön porta, mo Ferdigg tëgn sö la trata. N menüt dedô röva n atacant todësch dan Ferdigg y tira l’ palé sura vël fora. L’ portier ladin l’ abina ciamó n püch mo l’ palé vá inant y röva te porta por l’ 2-0. Dui menüc dedô manacia l’ Wiesen da fá ciamó n gol cun na bela trata dal limit dl’ area che vëgn deviada da Ferdigg cun na gran parada te ciantun. Al passa n menüt y n atacant de ciasa röva te area ladina, dribla n defensur y tira cuntra porta, mo Ferdigg é arjigné cá y salva la porta. Al 45^ ti é i padruns de ciasa da fa l’ terzo gol cun la defenjiun ladina che ne se capësc nia y lascia jí bí susc dui sogadusc dl’ Wiesen cuntra porta. Chisc mëss ma plü trá l’ palé te porta por l’ 3 a 0. N menüt dedô é la defenjiun dla Val Badia indô te na gran confujiun y insciö pó n atacant aversar sun sciampé trancuilamënter cun l’ palé, ruvé dan porta sú cuntra Ferdigg y porté i sü sön l’ 4 a 0 cun na bela trata. La Val Badia ne sá nia cis de ci vers che ara é ota. Dô chësta aziun sciüra l’ arbiter la fin dl pröm tëmp al 47^.
Tl’ secundo tëmp él la Val Badia che á la pröma ocajiun cun Mayr che pëia ia cuntra porta, mo al sé perd l’ palé y al ultim tirel ciamó dlungia ia. Al 61^ á incé l’ Wiesen la pröma ocajiun dl’ secundo tëmp cun na bela trata te area olaché Ferdigg ti é da paré cun n gran intervënt. Al 65^ á l’ Wiesen ciamó na ocajiun cun na trata da dalunc olaché Ferdigg ti é ciamó n iadé bun da mëte sües mans y salvé la porta. Al 77^ se porta i todësc sön l’ 5 a 0 cun na trata che l’ sogadú a podü fá cun la porta öta dô na bela aziun de süa scuadra. Al 90^ ti é i padruns de ciasa incé ciamó da se porté sön l’ 6 a 0 cun na gran trata de puniziun che röva sot l’ incrujada di lëgns y ne ti lascia degöna poscibilité a Ferdigg. Al 90^ dá l’ arbiter ciamó trëi menüc de recuper y insciö sciürl al 93^ la fin dla partida. Al é sté na partida olaché la Val Badia ne á mai albü na poscibilité. Al á mancé dediziun, coraje y idees de jüch, coses esenziales por l’ jüch al palé.

ASV Wiesen - ACD Val Badia: 6 - 0

Formaziun ACD Val Badia: 1. Ferdigg Rene, 2. Videsott Max, 3. Graffonara Simon (dal 46^ 13. Ploner Alexander), 4. Ploner Matteo, 5. Barbolini Florian, 6. Bernardi Luca, 7. Valentini Luca (dal 57^ 14. Crepaz Luca), 8. Stampfer Alex, 9. Unterweger Joel, 10. Denicolo Davide (dal 66^ 16. Pramstaller Lukas), 11. Mayr Marc (dal 83^ 15. Kostner Andre).

Alenadú: Graffonara Hanspeter.

Proscima partida: La proscima partida vëgn sogada n domënia, ai 26 de má, dales 15:30 cuntra l’ SSV Pfalzen sön l’ ciamp dal palé "Pradel" da San Martin.