Sabda, 11. mà 2024

N derby da stufé

N sabeda domisdé dales 16:30 él gnü soghé la partida de campionat de terza categoria danter l’ ACD Val Badia y l’ ASC Mareo B, l’ derby! Al é ste na partida dër combatüda mo cun püces ocajiuns sön trames les perts. 

La partida mët man y Verginer á al 4^ la pröma ocajiun dla partida cun na trata che é massa zentrala y saurida da paré por l’ portier. Al 13^ sé porta l’ Mareo söl 0-1 cun dër n bel gol sön trata de puniziun che röva sot l’ incrujada di lëgns de porta. Mo 5 menüc dedô ti é la Val Badia bele da parejé indô i cunc cun Stampfer che lascia pié ia na bela trata a giré che röva sot l’ incrujada di lëgns de porta por l’ 1-1. Al 27^ röva n atacant dl’ Mareo sú dan Ferdigg y tira l’ palé te porta por l’ vantaje marô, mo l’ arbiter anulëia l’ aziun por n forajüch. Al 41^ sciampá n sogadú dl’ Mareo ala defenjiun ladina y insciö mëss Plazza fá n fal da ultim om. L’ arbiter ti mostra la cherta cöcena y al mëss lascé l’ ciamp. 3 menüc dedô á l’ Mareo ciamó l’ ultima ocajiun dl’ pröm tëmp indô cun na trata de puniziun che Ferdigg para cun n bel intervënt. Dô chësta aziun ne sozedl plü nia y insciö sciüra l’ arbiter al 46^, dô n menüt de recuper, la fin dl’ pröm tëmp sön l’ resultat de 1-1.
Por odëi la pröma y unica ocajiun dl’ secundo tëmp mëss l’ publich aspete l’ 63^ canché l’ Mareo á na bela ocajiun sön trata de puniziun. La trata vá cuntra porta, mo Ferdigg é arjigné cá y para trancuilamënter l’ palé. Al 90^ dá l’ arbiter ciamó 4 menüc de recuper y insciö sciürl al 94^ la fin dla partida. Al é sté na partida dër blocada olaché trames les scuadres á plü ciaré da nia sé ciafé n gol co da nun fá un. Ala fin vá l’ 1-1 bun a trames les scuadres.

ACD Val Badia - ASC Mareo B: 1 - 1

Formaziun ACD Val Badia: 1. Ferdigg Rene, 13. Valentini Luca (dal 46^ 16. Mayr Marc),3. Barbolini Florian, 4. Ploner Matteo, 5. Plazza Armin, 6. Unterweger Joel (dal 91^ 2. Miribung Alex), 7. Videsott Max, 8. Denicolo Davide (dal 83^ 18. Bernardi Luca), 9. Verginer Thomas, 10. Clara Fabian, 11. Stampfer Alex.

Formaziun ASC Mareo B: 1. Pedevilla Alex, 2. Rungger Stefan, 3. Kastlunger Kevin, 4. Comploi Simon, 5. Ellecosta Alan, 6. Costabiei Manuel, 7. Rindler Matthias, 8. Castlunger Thomas, 9. Willeit David, 10. Rubatscher Alex, 11. Dal Molin Radames.

Alenadú: Graffonara Hanspeter.

Proscima partida: La proscima partida vëgn sogada n domënia, ai 19 de má, dales 15:30 cuntra l’ ASV Wiesen sön l’ ciamp dal palé da Wiesen.