Sabda, 04. mà 2024

Na burta prestaziun

N sabeda domisdé dales 16:30 él gnü soghé sön l’ ciamp "Pradel" da San Martin la partida de campionat de terza categoria danter l’ ACD Val Badia y l’ ASV Uttenheim. Na partida da desmentié por la scuadra ladina.

La pröma gran ocajiun dla partida pó l’ publich impormo odëi al 25^ canché na trata de cé de n atacant dl’ Uttenheim vá de püch dlungia porta ia dô n bel cross. Al 29^ dá Valentini na bela passada alta sura la defenjiun fora a Verginer che prô la conclujiun de pröma, mo l’ palé vá dlungia porta ia. Al 39^ á indô l’ Uttenheim na ocajiun cun na trata che vëgn naota parada da Ferdigg, mo spo sön la rebatöda de n ater sogadú ne pó plü l’ portier ladin fá nia y insciö se porta i todësc sön l’ 0-1. Al pê sciöche sce l’ pröm tëmp messes se ruvé sön chësc resultat, mo al 43^ se porta l’ Uttenheim ciamó sön l’ 0-2 dô che n sogadú röva te area ladina y lascia pié ia na trata che ti sciampa fora dles mans a Ferdigg y röva te porta. Al 45^ dá l’ arbiter ciamó dui menüc de recuper y insciö sciürl al 47^ la fin dl’ pröm tëmp.
L’ secundo tëmp mët man y dô apëna trëi menüc se porta i ghesć bele sön l’ 0-3. Dô n cross te area se mët n sogadú aversar jö l’ palé y lascia pié ia na bela trata bassa cuntra porta che ti dá la terza sodisfaziun dl dé. Al 53^ fej la scuadra aversara spo incé l’ cuarto gol cun na trata de cé tl’ ciantun bass de porta dô na trata dal ciantun. Ara ne ciara nia fora bun por la Val Badia. Al 60^ á incé i ladins indô na ocajiun da segné cun Verginer, mo süa trata vá de püch sura porta fora. Al passa ma trëi menüc y le resultat cambia bele indô. N atacant da Uttenheim röva bel sú dan Ferdigg, l’ dribla y mët l’ palé te porta öta por l’ 0-5. Dô chësta aziun ne sozedl por fortüna plü nia (por la Val Badia) y insciö sciüra l’ arbiter la fin dla partida al 90^ sënza menüc de recuper. Na burtiscima prestaziun di ladins che ne á mai albü idees de jüch y ne á mai trat sön porta.

ACD Val Badia - ASV Uttenheim: 0 - 5

Formaziun ACD Val Badia: 1. Ferdigg Rene, 2. Miribung Alex, 3. Barbolini Florian (dal 66^ 14. Graffonara Simon), 4. Ploner Matteo, 16. Clara Fabian (dal 50^ 17. Ploner Alexander), 6. Unterweger Joel (dal 67^ 13. Dallapiazza Simone), 7. Videsott Max, 8. Valentini Luca, 9. Verginer Thomas (dal 89^ 20. Pramstaller Lukas), 10. Denicolo Davide, 11. Stampfer Alex (dal 76^ 15. Palla Michele).

Alenadú: Graffonara Hanspeter.

Proscima partida: La proscima partida vëgn sogada n sabeda, ai 11 de má, dales 16:30 cuntra l’ ASC Mareo B sön l’ ciamp dal palé "Pradel" da San Martin.