Sabda, 27. aurì 2024

Tröp de costrui, mo püch de fat

N sabeda domisdé dales 16:30 él gnü soghé la partida de campionat de 3^ categoria danter l’ ACD Val Badia y l’ SC Percha. La scuadra ladina á porté na buna prestaziun, mo al ne á nia basté.

La partida mët man cun n bel ritm y al 13^ á la Val Badia la pröma ocajiun dla partida cun n bel passaje cuntra porta olaché l’ portier aversar mëss salté fora pert por apié l’ palé. Te chësta aziun rövl cuaji fora d’ area, mo l’ arbiter ne sciüra nia. Al 18^ á incé l’ Percha la pröma ocajiun cun na bela trata de n sogadú cuntra porta che vëgn deviada da n só compagn al ultim de cé sura porta fora. Al 21^ á indó la Val Badia na ocajiun cun Denicolo che lascia pié ia na bela trata da 30 metri che vëgn parada dal portier todësch cun n bel intervënt. Al 26^ se porta l’ Percha sön l’ 1-0 cun na bela trata de pröma tl ciantun bass de porta dô na trata dal ciantun. Ferdigg ne á podü fá nia. Mo 3 menüc dedô sciüra l’ arbiter n fal sön Denicolo te area y insciö ciafá la Val Badia na trata dai önesc metri. Denicolo se tol sö la responsabilité y trasforma la trata. 1-1. Al 34^ vëgnel assegné ala scuadra de ciasa na trata de puniziun dal limit che vëgn batüda de püch dlungia porta ia. Al 41^ á Valentini na bela ocajiun dô n bel passaje de Verginer che le porta püch dan porta olaché al prô la trata, mo ara vá a sbaté cuntra la traversa. N menüt dedô se porta l’ Percha sön l’ 2-1 cun na bela trata dal limit dl’ area olaché Ferdigg ne pó plü fá nia, mo la defenjiun á n püch dormí te chësta ocajiun. Dô chësta ocajiun ne sozedl plü nia y insciö sciüra l’ arbiter la fin dl pröm tëmp al 47^.
La pröma oportunité dl’ secundo tëmp á l’ Percha cun na bela trata che vá de püch sura porta fora. Al 55^ mët Valentini na bela trata dal ciantun te area olaché Barbolini prô la trata de cé, mo l’ portier aversar é arjigné cá y para. Ti proscimi menüc é la partida ecuilibrada cun n bel jüch y ocajiuns sön trames les perts. Mo al 79^ se porta i todësc sön l’ 3-1 cun na trata de cé cuntra porta dô n cross alt dala fascia. Al 83^ manacia l’ Percha ciamó da fa l’ cuarto gol cun na gran trata olaché Ferdigg mëss trá fora döt só talënt por devié l’ palé sura porta fora. Al 86^ á ciamó Mayr na ocajiun, mo l’ palé vá dlungia porta ia. Y insciö sciüra l’ arbiter al 93^, dô 3 menüc de recuper, la fin dla partida sön l’ resultat de 3-1. Al é sté na bela partida cun ocajiuns sön trames les perts, mo ala fin é i padruns de ciasa stá mius da concretizé les ocajiuns che ai á albü.

SSV Percha - ACD Val Badia: 3 - 1

Formaziun ACD Val Badia: 1. Ferdigg Rene, 2. Miribung Alex, 3. Barbolini Florian, 4. Videsott Max, 5. Ploner Matteo, 6. Stampfer Alex (dal 80^ 14. Dallapiazza Simone), 7. Unterweger Joel, 8. Clara Fabian (dal 69^ 17. Mayr Marc), 9. Valentini Luca, 10. Denicolo Davide, 11. Verginer Thomas (dal 86^ 18. Crepaz Luca).

Alenadú: Graffonara Hanspeter.

Proscima partida: La proscima partida vëgn sogada n sabeda, ai 4 de má, dales 16:30 cuntra l’ ASV Uttenheim sön l’ ciamp dal palé da La Ila.