Sabda, 13. aurì 2024

Cuntra i mius él tres rî

N sabeda domisdé él gnü soghé dales 15:30 te n bun cialt la partida de campionat de 3^ categoria danter l’ AFC Sterzing y l’ ACD Val Badia. Incé sce i ladins á porté na buna prestaziun ne ti esi nia sta bugn da porté punc a ciasa.

La partida mët man y al 5^ á i padruns de ciasa la pröma ocajiun dla partida cun na trata de cé dô na trata dal ciantun che vëgn parada da Ferdigg. Al 10^ ai ciamó na ocajiun cun na bela trata dal limit dl’ area, mo Ferdigg á püces dificoltes da apié l’ palé. Al 13^ á spo incé la Val Badia na ocajiun dai önesc metri por n fal de n defensur aversar sön n atacant ladin te area. Verginer se tol sö la inciaria dla trata, mo l’ portier capësc olaché al ô trá y para. Le resultat resta sön l’ 0-0. Al 29^ ti é l’ Sterzing da se porté inant cun le resultat por 1-0. N sogadú todësch prô la trata da dalunc cuntra porta, madër che chësta vëgn deviada dala defenjiun ladina y röva te porta. Dui menüc dedô á l’ Sterzing ciamó na gran ocajiun cun na trata che vá dlungia Ferdigg ia y vá cuntra porta, mo Ploner M. salva al’ ultim sön strisciura de porta. N gran intervënt. Al 34^ á i padruns de ciasa ciamó l’ ultima ocajiun dl’ pröm tëmp cun na trata de cé dô n cross che vá de püch dlungia porta ia. Al 47^, dô dui menüc de recuper, sciüra l’ arbiter la fin dl’ pröm tëmp sön l’ resultat de 1-0.
La pröma aziun dl’ secundo tëmp pó l’ publich odëi al 56^ canché n sogadú dl’ Sterzing röva te area y prô la trata, mo la defenjiun ladina é buna da tigni sö al ultim l’ palé. Al 65^ á l’ Sterzing ciamó na ocajiun cun na trata de cé, mo chësc iadé vá l’ palé sön la pert de fora dla rëi de porta. Al 89^ á la Val Badia ciamó n ultim iadé na grandiscima ocajiun cun Valentini che röva sú dan l’ portier y tira, mo l’ numer un di todësc para l’ palé te ciantun y salva l’ resultat. Al 92^ ti é spo l’ Sterzing incé ciamó da se porté sön l’ 2-0 cun na bela trata bassa de pröma dô n cross che vá tl’ ciantun bass de porta. Ferdigg ne á plü degöna poscibilité. Al 94^, dô 4 menüc de recuper, sciüra l’ arbiter la fin dla partida. Al é ste na bela partida olaché la Val Badia á mostré na gran prestaziun cuntra i pröms te classifica y ess magari incé podü se porté almanco n punt a ciasa.

ASD Sterzing - ACD Val Badia: 2 - 0

Formaziun ACD Val Badia: 1. Ferdigg Rene, 2. Miribung Alex, 3. Barbolini Florian, 4. Ploner Matteo, 5. Plazza Armin, 6. Stampfer Alex, 7. Videsott Max, 8. Clara Fabian (dal 62^ 19. Mayr Marc), 9. Valentini Luca, 10. Denicolo Davide, 11. Verginer Thomas (dal 69^ 13. Dallapiazza Simone).

Alenadú: Graffonara Hanspeter.

Proscima partida: La proscima partida vëgn sogada n sabeda, ai 20 de aurí, dales 16:00 cuntra l’ ASC Olang sön l’ ciamp dal palé da La Ila.