Sabda, 06. aurì 2024

N derby de füch

N sabeda domisdé, sot a n bel sorëdl, él gnü soghé le derby danter l’ ACD Val Badia y l’ US La Val tl campionat de 3^ categoria. Na bela prestaziun dla Val Badia ti á porté de beles aziuns, de bi goi y i 3 punc.

La partida mët man cun 10 menüc de ritardo. Mo bele al 3^ pon odëi l’ pröm gol dla partida. Dô na trata dal ciantun dl’ La Val sciüra l’ arbiter na trata dai önesc metri olaché degügn ne á capí avisa ciudi. La trata röva tl’ ciantun alt de porta y ne ti lascia degöna poscibilité a Ferdigg. 0-1. Le publich mëss aspeté l’ 23^ por odëi la proscima aziun olaché Denicolo á na ocajiun de cé, mo la trata vëgn parada dal portier di aversars. 6 menüc dedô á i padruns de ciasa indô na ocajiun cun na trata de cé, mo Barbolini la tira dlungia porta ia. Al 35^ salva Ferdigg la Val Badia cun n gran intervënt cun la iama dô na trata de n sogadú che é rové sú dan da vël te area. Al 39^ ti é la Val Badia da se porté söl pêr. Dô n bel cross bass ite amez él Verginer che röva sön l’ palé, tira de pröma cuntra porta y ne ti lascia degöna poscibilité al numer 1 aversar. 1-1. Al 45^ vëgn n sogadú da La Val sciuré fora de ciamp por protesta. L’ arbiter dá 4 menüc de recuper. Al 49^ á l’ La Val ciamó na ocajiun cun na trata de puniziun dal limit dl’ area, mo Ferdigg é arjigné cá y para. Dô chësta aziun sciüra l’ arbiter la fin dl’ pröm tëmp sön l’ resultat de 1-1.
L’ secundo tëmp mët man cun na gran trata de Denicolo al 56^ cuntra porta, olaché l’ portier aversar ti é ciamó al ultim da paré l’ palé te ciantun. Sön la trata dal ciantun sciüra n defensur da La Val n atacant dla Val Badia ia por tera y l’ arbiter sciüra na trata dai önesc metri. Verginer se tol sö la inciaria y tira bass te porta, gol y 2-1. Sön chësta aziun él gnü sciuré fora ciamó n sogadú da La Val por protesta. Al 70^ ciafá Barbolini l’ palé y ti l’ dá zoruch a Denicolo che tira de pröma de püch dlungia porta ia. Al 77^ á Denicolo ciamó na ocajiun por segné y chësc iadé ne sbagliel nia. Al röva sú cun l’ palé dan porta y tira bass dlungia l’ portier ia. 3-1. Dui menüc dedô se porta la Val Badia incé sön l’ 4-1 cun n eurogol de Unterweger, che tira de pröma al volo cuntra porta dal limit dl’ area. Dui menüc dedô podess i ghesć de ciasa incé fá l’ cuinto gol sön n cross bass te area, mo Mayr tira dlungia porta ia. Al 88^ ti é l’ La Val ciamó da fá n grandiscimo gol cun na trata da 30 metri che vá dlungia l’ pé de porta ité. 4-2. Al 93^ á Dallapiazza ciamó l’ ultima ocajiun dla partida, mo süa trata vëgn deviada demez dal defensur aversar. Y insciö, do 4 menüc de recuper, se röva la partida sön l’ resultat de 4-2 por la Val Badia. Al é sté na partida dër combatüda cina la fin olaché la scuadra de ciasa á ala fin impó mostré plü cualité y plü idees de jüch.

ACD Val Badia - US La Val: 4 - 2

Formaziun ACD Val Badia: 1. Ferdigg Rene, 2. Miribung Alex (dal 76^ 18. Unterweger Joel), 3. Graffonara Simon, 4. Ploner Matteo, 5. Barbolini Florian, 6. Videsott Max, 7. Plazza Armin, 8. Stampfer Alex (dal 84^ 14. Dallapiazza Simone), 9. Valentini Luca (dal 89^ 15. Ploner Alexander), 10. Denicolo Davide, 11. Verginer Thomas (dal 66^ 13. Mayr Marc).

Alenadú: Graffonara Hanspeter.

Proscima partida: La proscima partida vëgn sogada n sabeda, ai 13 de aurí, dales 15:30 cuntra l’ AFC Sterzing sön l’ ciamp dal palé da Sterzing.