Domënia, 19. novëmber 2023

L’ ultima por l’ 2023

N domënia él gnü soghé sön l’ ciamp dal palé da La Ila la partida de copa provinzia de 3^ categoria y incé l’ ultima partida por l’ 2023 danter l’ ACD Val Badia y l’ ASD Untermais. Na partida dër combatüda cina la fin olaché ai ladins ti al mancé n püch de fortüna.

La partida mët man y al 10^ pon bel odëi la pröma ocajiun dla partida. Dô na trata dal ciantun cun n cross te area salta Barbolini sö de cé y prô la trata, mo l’ palé vá de püch sura fora. Al 18^ á la Val Badia ciamó na ocajiun cun Valentini che ti sciampa a n defensur y mët l’ palé ite amesa area olaché Ploner A. prô la trata de pröma mo l’ palé vá dlungia porta ia. Al 23^ á incé i todësc na ocajiun cun na bela trata da dalunc che vá de püch sura Ferdigg fora. Dui menüc dedô ti é l’ Untermais da se porté in vantaje cun l’ atacant che ciafá l’ palé te area y lascia atira pié ia na gran trata bassa che röva tl’ ciantun bass de porta olaché Ferdigg ne pó plü fá nia. 0-1. Al 37^ á indô i ladins na ocajiun cun Valentini che ciafá l’ palé al limit dl’ area y prô la trata cuntra porta, mo la cogura vá de püch sura porta fora. Al 45^ ciafá la Val Badia ciamó na trata de puniziun. Valentini se tol sö la inciaria da la trá. La trata é bela mo l’ portier ti é da la paré ados a n sogadú ladin che prô ciamó n iade la trata mo chësc iade para l’ portier te ciantun. Dô chësta aziun dá l’ arbiter ciamó n menüt de recuper dan co sciuré la fin dl’ pröm tëmp al 46^.
La pröma aziun dl’ secundo tëmp pó l’ publich odëi al 49^ canché n sogadú da Untermais prô la trata cuntra porta dô n bel cross de n só compagn, mo l’ palé vá sura porta fora. 4 menüc dedô prô l’ Untermais indô la conclujiun cuntra porta da dalunc y incé chësc iade vá l’ palé de püch sura porta fora. Al 59^ ti garetl ai ghesć spo l’ secundo gol. Dô n bel cross te area salta n atacant sö de cé y tira cuntra porta olaché Ferdigg ne pó plü fá nia. 0-2. Y ma 5 menüc dedô ti é l’ Untermais bele da se porté sön l’ 0-3 cun na beliscima trata da 30 metri che röva sot l’ incrujada di lëgns y ne ti lascia degöna poscibilité al portier ladin. Al pê che la partida é destinada da se ruvé insciö mo al 81^ vëgn Valentini lancé sön la fascia olaché al mët n bel cross te area pur Pizzinini che tira de pröma cuntra porta y abina l’ ciantun bass por l’ 1-3. 2 menüc dedô á l’ Untermais indô na ocajiun cun na bela trata a giré dal limit dl’ area che vá de dër püch sura porta fora. Al 85^ ciafá Valentini l’ palé te area y l’ mët jö. Canché al prô da se oje vëgnel sburlé ia pur tera dal defensur aversar y l’ arbiter tol la dezijiun da dé na trata dai önesc metri. Verginer se tol sö la inciaria da le trá y fej incé gol cun na bela trata bassa tl’ ciantun. 2-3. La Val Badia sënt che al é ciamó speranza. N menüt dedô vëgn incé n defensur aversar sciuré fora de campo por na discusciun cun l’ arbiter. Al 92^ á l’ Untermais ciamó na gran ocajiun cun na bela trata de puniziun che vá de püch dlungia l’ pé de porta ia. Dô chësta ocajiun ne sozedl plü nia y insciö sciüra l’ arbiter al 94^, dô 4 menüc de recuper, la fin dla partida. Al é sté na partida dër combatüda y ecuilibrada olaché degöna dles scuadres é stades mius co l’ atra.

ACD Val Badia - ASD Untermais: 2 - 3

Formaziun ACD Val Badia: 1. Ferdigg Rene (dal 65^ 12. Kastlunger Alex), 2. Miribung Alex, 3. Ploner Matteo, 4. Videsott Max, 5. Barbolini Florian, 6. Pizzinini Luca, 7. Clara Fabian, 8. Plazza Armin (dal 84^ 14. Crepaz Luca), 9. Verginer Thomas, 10. Valentini Luca, 11. Ploner Alexander (dal 67^ 16. Pramstaller Lukas).

Alenadú: Graffonara Hanspeter