Sabda, 23. setëmber 2023

Na batosta sënza fin

N sabeda él gnü soghé sön l’ ciamp dal palé "Pradel" a San Martin la terza partida de campionat de terza categoria danter l’ ACD Val Badia y l’ ASD Sterzing. La Val Badia se á ciafé na gran batosta cuntra na scuadra che é de tröp miú.

Al 5^ pó le publich odëi la pröma ocajiun dla partida por le Sterzing che prô la trata cuntra porta dal limit dl’ area, mo Ferdigg para. 2 menüc dedô ai ciamó na ocajiun cun n bel cross da na pert ité che vëgn indô tigní sö dal numer un ladin. Al 14^ passa l’ Sterzing in vantaje cun na bela trata cuntra porta che vëgn naota tignida sö da Ferdigg, mo spo ti sliziera fora dles mans y röva te porta por l’ 0-1. Y 3 menüc dedô se porta i todësc sön l’ 0-2 cun na trata scimpla te porta dl’ atacant dô n bel cross bass te area ladina. N menüt dedô sciüra l’ arbiter n önesc metri por la Val Badia por n fal de man da pert de n defensur todësch. Pizzinini L. surantol la responsabilité dl’ önesc metri y tira te porta por l’ 1-2. Al 23^ ti sciampa n sogadú da Sterzing ala defenjiun ladina, al vá cuntra porta y pó trá trancuilamënter dassú dan Ferdigg. 1-3. Al 30^ se porta i ghesć sön l’ 1-4 cun na gran trata de rebatöda dô na trata dal ciantun. Cun n püch de fortüna röva l’ palé te porta y porta inant l’ Sterzing de 3 goi. Dô chësta aziun ne sozedl nia plü tröp y insciö sciüra l’ arbiter al 45^ la fin dl’ pröm tëmp sënza recuper.
L’ secundo tëmp mët man y dô 5 menüc pon bele odëi l’ cuinto gol di todësc. N atacant ciafá na bela passada te area olaché al mëss ma plü archité l’ palé y le trá te porta por l’ 1-5. Al 53^ prô n sogadú aversar na trata cuntra porta che vëgn deviada al ultim da n só compagn de scuadra y vá te porta olaché Ferdigg ne á plü degöna poscibilité. Gol y 1-6. La partida mët man da deventé dër pesocia por i ladins alená da Graffonara. Al 60^ röva l’ Sterzing cun na bela aziun dan porta ladina y tira, mo l’ portier ladin é arjigné ca y para cun n gran intervënt. Al 75^ röva n sogadú todësch sú t area ladina y tira, mo la trata vá de püch dlungia ia. Al 84^ se porta i aversars spo sön l’ 1-7 cun na bela trata dal limit dl’ area che vá de püch dlungia Ferdigg ia dan co jí te porta. 3 menüc dan la fin, al 87^, fej i todësc incé ciamó l’ otavo gol cun na bela trata da dalunc che röva tl’ ciantun bass de porta. 1-8. Dô chësta aziun ne sozedl plü nia y insciö sciüra l’ arbiter la fin dla partida al 91^, dô n menüt de recuper. Na partida sogada maliscimo da la scuadra ladina che ne á mai metü in dificulté i aversars che ê de tröp mius, n pass fals dla Val Badia che ne dij ciamó nia sura l’ ciampionat deache ara é ciamó lungia y al pó sozed de döt…

ACD Val Badia - ASD Sterzing: 1 - 8

Formaziun ACD Val Badia: 1. Ferdigg Rene, 2. Miribung Alex (dal 83^ 20. Costner Andre), 3. Barbolini Florian (dal 46^ 16. Unterweger Joel), 4. Plazza Armin, 5. Videsott Max, 6. Graffonara Simon, 7. Pizzinini Luca (dal 73^ 14. Dallapiazza Simone), 8. Clara Fabian, 9. Mayr Marc, 10. Valentini Luca, 11. Pizzinini David (dal 83^ 17. Ploner Alexander).

Alenadú: Graffonara Hanspeter.

Proscima partida: La proscima partida vëgn sogada n sabeda, ai 30 de setëmber, dales 15:30 cuntra l’ ASC Olang sön l’ ciamp dal palé da Valdaora.