Sabda, 29. aurì 2023

N derby de füch

Te na sabeda domisdé d’ aisciöda él gnü soghé l’ derby ladin de campionat de 3^ categoria danter l’ ACD Val Badia y l’ US La Val. Na partida combatüda cina la fin olaché la Val Badia se á porté a ciasa i trëi punc dan da n publich dales granes ocajiuns.

Al 3^ él l’ La Val che á süa pröma ocajiun cun na trata de puniziun che vá a sbaté sön la traversa. 2 menüc dedô él incé la Val Badia che á süa pröma ocajiun cun Pizzinini che ciafá na gran trata che vá a sbaté indô sön la traversa. N gran scomenciamënt dla partida. Al 24^ él Valentini che prô la trata da dalunc cuntra la porta da La Val, mo l’ portier é arjigné y para. Al 31^ él indô la Val Badia che á na ocajiun cun Stampfer che lascia pié ia na bela trata dal limit dl’ area che vá de püch dlungia porta ia. Al 42^ röva l’ La Val dan porta cun na bela aziun y mët l’ palé ite amez. Al atacant che röva sön chësc palé ne ti garetel nia la trata y insciö vá l’ palé de püch dlungia porta ia. Al 46^, dô n menüt de recuper, él spo l’ arbiter che sciüra la fin dl’ pröm tëmp sön l’ resultat de 0-0.

Al 48^, püch dô che les scuadres é indô gnüdes te ciamp, garetl spo l’ gol dezisif: Pizzinini röva jö sön na pert, mët t' area n bel cross bass sön chël che Stampfer röva y le tira te porta por l’ 1-0 dla Val Badia. Al 60^ él indô la Val Badia che á na ocajiun cun na bela trata de puniziun de Fersuoch che vëgn parada dal portier. Al 76^ él indô Pizzinini che á na ocajiun cun na trata da dër da dalunc che vá de püch dlungia ia. Al 82^ él Pizzinini che mët indô n cross t' area olaché al é n pez confujiun dan che n defensur da La Val tires demez l’ palé. Al 85^, püch dan la fin, ti gareta al La Val ciamó na gran ocajiun cun na bela trata cuntra porta che vá indô a sbaté cuntra la traversa. Dô chësta aziun él spo incé l’ arbiter che sciüra la fin dla partida dô trëi menüc de recuper sön l’ resultat de 0-1. Al é sté na partida dër combatüda cina la fin cun tröpes ocajiuns sön trames les perts. Mo ala fin él impó sté la Val Badia che á albü val in plü.

US La Val - ACD Val Badia: 0 - 1

Formaziun ACD Val Badia: 1. Ferdigg Rene, 2. Miribung Alex, 3. Graffonara Simon, 4. Crepaz Omar, 5. Fersuoch Kewin, 6. Ploner Matteo, 7. Valentini Luca (dal 76^ 13. Bernardi Luca), 8. Stampfer Alex (dal 85^ 15. Ploner Alexander), 9. Pizzinini Luca, 10. Dallapiazza Simone (dal 64^ 16. Pellegrini Davide), 11. Videsott Max.

Alenadú: Crepaz Gianni.

Proscima partida: La proscima partida vëgn sogada n domënia, ai 7 de má, dales 16:00 cuntra l’ SSV Pfalzen sön l’ ciamp dal palé da La Ila.