Sabda, 15. aurì 2023

Tröc goi mo impó degügn punc

N sabeda, ai 15 de aurí, él gnü soghé la partita de 3^ categoria danter l’ ASV Percha y l’ ACD Val Badia sön l’ ciamp dal palé da Percha. Al é sté na partida combatüda cina la fin cun tröp impëgn sön trames les perts.

La partida mët man cun la pröma aziun al 9^ por l’ Percha. Dô na trata dal ciantun resta l’ palé n pez te area dan che n sogadú todësch le tira te porta por l’ 1-0. Mo 3 menüc dedô él bel la Val Badia che ciafá l’ pêr cun Dallapiazza che mët jö l’ pale te area y lascia pié ia na bela trata bassa che va tl ciantun bass. 1-1. Al 18^ él i ladins che ti é da se porté sön l’ 2-1 cun Pizzinini che ciafa l’ palé do n aziun sbaliada dla Val Badia y prô atira la trata da püc metri che vá te porta. Sëgn é la Val Badia in vantaje. Al 23^ él l’ Percha che á indo na ocajiun cun na bela trata de cé, dô n cross, che vá de püch dlungia porta ia. Al 26^ él l’ Percha che röva dan porta cun na bela aziun. Frenademetz prô da gní fora adora assa mo al é massa tert y insciö él i todësc che pó trá cun trancuilité te porta por l’ 2-2. Al 37^ él indô i ladins prigurusc cun na bela aziun che porta Pizzinini dan porta. Al prô la trata mo ara vá de püch dlungia porta ia. Y insciö él incé l’ pröm tëmp che se röia sön l’ resultat de 2-2.
Por udëi la pröma ocajiun dl’ secundo tëmp mëss l’ publich aspeté l’ 62^. L’ Percha prô da ti dé l’ palé al’ atacant cun n cross che röva sön só cé, mo la trata vá de püch dlungia porta ia. Al 63^ él n atacant todësch che dribla n defensur ladin, röva t area y lascia pié ia na bela trata bassa che Frenademetz ne é nia plü bun da abiné. Sëgn é indô la scuadra de ciasa in vantaje. Al 68^ él indô l’ Percha che á na gran ocajiun cun na trata che vëgn deviada da n defensur ladin che manacia l’ autogol. L’ palé vá de püch dlungia ia. Al 69^ él finalmënter incé la Val Badia che á la pröma ocajiun dl’ secundo tëmp cun na bela aziun che porta l’ palé t’ area olaché al resta n pez dan che Dallapiazza le tires te porta cun na bela trata bassa. N gran dé por Dallapiazza che á segné dui goi. 3-3, les döes scuadres é indô söl pêr. 3 menüc dedô, al 72^, él l’ Percha che prô da se porté in vantaje cun na bela trata, mo la parada de Frenademetz é ciamó plü bela y insciö ciafá i todësc ma na trata dal ciantun. Al 74^ él ciamo na ocajiun por l’ Percha cun la trata che vëgn ciamó tignida sö al ultim momënt sön la strisciura de porta da Graffonara. Al 81^, dô na trata dal ciantun él na gran confujiun t’ area, an ne capësc plü nia. Te n iade ti é n sogadú dl’ Percha da arlungé na iama y trá l’ palé te porta por l’ 4-3 final. Al 90^ él l’ arbiter che dá ciamó 3 menüc de recuper y insciö, al 93^, él l’ arbiter che sciüra la fin.
Al é sté na partida dër combatüda cina la fin olaché i padruns de ciasa ti é impo sta bugn da porté l’ resultat a ciasa. Na buna prestaziun por l’ ACD Val Badia.

ASV Percha - ACD Val Badia: 4 - 3

Formaziun ACD Val Badia: 1. Frenademetz Denis, 2. Miribung Alex, 3. Graffonara Simon, 4. Videsott Max, 5. Fersuoch Kewin, 6. Ploner Matteo, 7. Valentini Luca (dal 72^ Bernardi Luca), 8. Stampfer Alex (dal 78^ Ploner Alexander), 9. Pizzinini David, 10. Dallapiazza Simone, 11. Pellegrini Davide

Alenadú: Crepaz Gianni.

Proscima partida: La proscima partida vëgn sogada n domënia, ai 23 de aurí, dales 16:00 cuntra l’ Gitschberg Jochtal B sön l’ ciamp dal palé da La Ila.