Sabda, 25. merz 2023

Cun na secia pordöda é piada ia la Val Badia tl rode da d' aiscöda

Cun na secia pordöda por 6 a 1 à metú man la scuadra dla Val Badia les partides da d' aiscöda. Bele le resultat dij döt, al es ince podú ester plú posoch. Feter por döta la partida ti é stada la formaziun dl Uttenheim sura cé ai ladins. I pustri é la terza forza dl campionat, na buna scuadra che fej giré der tröp le palê sön süa gran plaza. La Val Badia à sbalié tröp sides sön fá le jüch, cho tl' defene. Ince la dërta concentraziun y grinta à falé valgamia.

La partida à bele atira metú man der mal. Al 3' menüt maza jö le defensur Ferusoch n atacant puster te aria, atira scüra le arbiter en önescmetri. La trata dl önesc Schwärzer é secia bassa sön la man ciampa de Ferdigg che azica de püch le curan che röia te porta por le 1 a 0. Dô da 17' de jüch pert i ladins n palê à mesaciamp, le önesc Schwärzer se prejenta sú dan le un ladin che é bun da devié süa trata. Al 19' menüt él na indecijiun dl trei Kastlunger sön na trata lungia, le palê röia al sú set Valorz che dan porta segna le 2 a 0. Dô da ma mesora de jüch pozarneia i defensurs dl Uttenheim dan la gran aria. Le curan röia al sú Videsott che püch dan porta tira fora de n nia lungia le pé bass. Arjomada la gran ocajiun por le 2 a 1, toma al 32' menüt le 3 a 0. Cun n' aziun cun deplú sogadus tai fora döta la defensciun dla VB y röia le nú Achmüller sú dan Ferdigg ala saorida deviaziun te porta. Feter cun na medema aziun toma al 41' de jüch ince le 4 a 0. Na bela passada te aria dl nú Achmüller met sú dan porta le önesc Schwärzer che bat Ferdigg. Al 43' menüt por n fal sön Pizzinini ciafa la Val Badia na puniziun n gran toch dan aria. I defensurs pustri à bindebó dî da met só le mür defensif. La bela trata de punziun de Valentini röia alta sot l' incrujada ite te porta, n gran bel gol. Dô da 69' menüc röia le 5 a 1. Sö n cross cuntra l' aria ladina röia ite dan porta Lahner che segna. Al 78' toma ince ciamò le 6 a 1. Da na pert ite röia saltan le defensur ladin le dejedot Santer che tira te porta de n desconsolé Ferdigg. Al 84ejim tira Bernardi na puniziunte da dan le limit dl aria. Le un dl Uttenheim para sigú. Dô chesta burta figöra tla pröma de "ritorno", sperun sambegn de n fá de mius. Intratant esun tomá jó te tlassament al penultim post, la scuadra da La Val à davagné y ti é passada ala VB dant de trei punc.

ASV Uttenheim - ACD Val Badia: 6 - 1

Formaziun dla Val Badia: 1.Rene Ferdigg, 2.Luca Valentini, 3.Mattia Kastlunger (dal 79' Florian Barbolini), 4.Omar Crepaz (dal 85' Andre Costner), 5.Matteo Ploner, 6.Kevin Ferusoch, 7.Davide Denicolo (dal 62' Alex Miribung), 8.Alex Stampfer (capitan)(dal 79' Emanuele Sintoni), 9.Max Videsott, 10.Luca Pizzinini (dal 73' Luca Bernardi), 11.Davide Pellegrini.

Alenadù: Gianni Crepaz/Paolo Adami.

Gol por la Val Badia: 43' Luca Valentini.

Proscima partida:  en domenia ai 2 d' aorì 2023 da les 16:00 sön la plaza da La Ila cuntra le Sterzing.