Domënia, 03. otober 2022

Propi tl derby cuntra La Val ti garetl ala Val Badia la pröma deventa y i pröms punc te tlassament. La Val Badia à soghè la gran pert dla partida en diesc.

Te n bel domisdé da d' altonn él gnú soghè l` ultima domenia le derby danter la Val Badia y La Val, che se incuntra indô te terza categoria. N bel publich interescé à podú se gode le derby che à bité ince de plú ocajiuns y emoziouns.

Te tlassament é metoda la scuadra da La Val miú, ara pó mostré só sis punc cun dös deventes. La VB é chita al ultimo post cun "zero" punc. Mó gonot à i "Derby" döt n' atra direziun. Al é sogadus chi i sent deplú y à na certa nervosité. É chí demanco. Al 15` menüt él na trata de Schrott che passa dlungia porta ia. Dô da 21` menüc pert La Val n palê à mesaciamp. Da na pert jó salta cun slöm Pellegrini che cröseia bass te aria. Sön la trata röia Schrott che é bun à val moda da devié te porta de Erlacher por le 1 a 0. Al 23` de jüch röia na trata lungia cuntra aria dla Val Badia, sön chesta röia le nú Nagler da La Val. Sön le contrast cun Kastlunger vegn chesc mazé sot y sura. Le jonn arbiter cun decijiun ti mostra al cinch dla VB la cherta cöcena. Desgort. I ghesc cera de sfruté la superiorité. Ai röia ince pró dös de bunes ocajiuns. Al 35ejim cun Felix Nagler cun na trata bassa che passa basa dan porta de Ferdigg ia. Le medemo atacant röia sú dan porta ala deviaziun de cé che é alta sura porta fora, al 42` menüt. Danter chestes ocajiuns por La Val él ince da odei na bela aziun da na pert ite tl aria de Pizzinini, süa trata vegn para ia por tera dal un da La Val. Cun le vantaje defenú cun tröp sacrifize da pert dla VB vanse tla palsa. Al 49`de jüch tira da fora dl aria te porta le fresch te ciamp Elzenbaumer, Ferdigg para sigú ia por tera. Dô da 71` menüc röia te aria Tolpeit che tira te porta sech. Le verdaporta dla Val Badia fej na gran parada devian da na pert fora. N menüt dedô tira Del Negro te poprta da La Val, Erlacher robat por dui iadi. Al 79` menüt röia na trata alta por le capitan Sottara che bel sú dan porta devieia sura fora. Cun n pú de fortüna y cumbaton cina le sest menüt de recuper se porta la Val Badia la pröma deventa dl campiont à ciasa. Le derby é sté bun arbitré, le jonn arbiter à mâ trat fora cater chertes gheles. Dös por pert. Dedô é stades trames les scuadre à fá n pú de festa, comentan la partida.

ACD Val Badia - US La Val: 1 - 0

Formaziun Val Badia: 1.Rene Ferdigg, 2.Alex Miribung (dal 92` Simon Graffonara), 3.Davide Pellegrini, 4.Omar Crepaz (dal 76` Emanuele Sintoni), 5.Mattia Kastlunger, 6.Florian Barbolini (capitan), 7.Luca Bernardi (dal 28` Matteo Ploner), 8.Roberto Del Negro, 9.Max Videsott, 10.Luca Pizzinini (dal 55` Marc Mayr), 11.Felix Schrott.

Alenadus: Gianni Crepaz y Hanspeter Graffonara.

Gol: 21` Felix Schrott.

Formaziun La Val: 1.Giovanni Erlacher, 2.Alex Ploner, 3.Alan Ellecosta (dal 46` Alex Elzenbaumer), 4.Max Nagler (dal 21` Simon Campei), 5.Paolo Valazza, 6.Christian Terza, 7. Manuel Ties, 8.Stefan Sottara (capitan), 9.Felix Nagler (dal 66` Philipp Moling), 10.Mattia Mutschlechner (dal 64` Franz Tolpeit), 11.Alex Miribung.

Alenadus: Patrick Costabiei y Albert Castlunger.

Proscimes partides:  La Val sügha en sabeda ai 8 d` otober te ciasa cuntra Uttenheim da les 15:30. La Val Badia sügha la domenia ai 9 d´ otober fora de ciasa cuntra Falzes ince da les 15:30.