Domënia, 29. má 2022

L’ ultima partida ti dá l’ ultim post al’ ACD Val Badia

Te n domisdé da burt tëmp él gnü soghé l‘ ultima partida de campionat de 2^ categoria sön l’ ciamp dal palé "Pradel" danter l’ ACD Val Badia y l’ SSV Pfalzen. La scuadra ladina á stlüt jö la sajun cun na burta prestaziun y l’ ultim post te classifica.

La partita mët man cun la pröma ocajiun por l’ Falzes al 4^. N sogadú todësch röva a 30 metri dan l’ area dl’ portier y lascia pié ia na bela trata bassa che röva tl ciantun bass de porta, olache Ferdigg ne pó plü fá nia. Do 4 menüc stara bel 1-0 por la scuadra da Falzes. Al 17^ él spo l’ Falzes che á indô na ocajiun cun n tiro da dalunc mo chësc iade él Ferdigg che è posizioné bun y para cun tranquilité l’ palé. Al 21^ él l’ Falzes che á na gran ocajiun cun na trata che vá sura Ferdigg fora y vá ma de püch dlungia porta ia. Al 28^ él spo incé la Val Badia che á süa pröma ocajiun cun Del Negro che lascia pié ia na bela trata da dalunc che vá a sbaté söl palo dan co ruvé fora de campo. Na grandiscima ocajiun olache Del Negro á desmostré süa gran abilité da trá te porta. Al 32^ él la Val Badia che á ciamó na ocajiun cun Dallapiazza che röva sú dan l’ portier do na bela passada y prô la trata, mo l’ portier di todësc salva l’ resultat cun na gran parada. N menüt dedô, al 33^, él spo indô l’ Falzes che atachëia mo la trata finala vá de püch dlungia porta ia. Al 38^ él l’ ultima ocajiun dl’ pröm tëmp. L’ Falzes röva dan porta di ladins y prô da fa gol, mo Ferdigg respogn presënt y para la trata cun na gran parada cun i pisc. Y insciö se röva incé l’ pröm tëmp sön l’ resultat de 0-1.
L secundo tëmp mët man cun na ocajiun por l’ Falzes al 48^, che röva cun n sogadú bel sú dan porta mo chësc tira adôs a Ferdigg che è posizioné dër bun. Al 57^ toml spo l’ 2-0 por l’ Falzes. Sön na trata dal ciantun él l’ palé che röva ite amez, degügn ne l’ tira demez y insciö él n sogadú dl’ Falzes che pó la mëte te porta de cé. N gran fal dla defenjiun ladina. Al 61^ él Kastlunger che prô la trata da dalunc che vá de püch sura fora. Al 71^ él spo l’ Falzes che sbalia n gol praticamënter bel fat. Dô n cross él l’ atacant aversar che ciafa l’ palé söl cé cun la porta öta dan da vël. Al lascia pié ia la trata de cé mo chësta vá sura fora. Val de te ne vëigun nia gonot. Al 72^ él indô la Val Badia che atachëia cun Valentini che tira da fora d’ area y l’ palé vá de püch dlungia porta ia. Al 74^ él Conrater che mët n bel cross te area olache n defensur aversar röva al ultim momënt y la tira demez. Dui menüc dedô, al 76^, él indô Valentini che á na gran poscibilité da segné de cé, mo l’ portier aversar è reatif y deviëia l’ palé cun na gran parada. Püch dedô él Del Negro che lascia pié ia na gran trata da fora d’ area che vëgn indô parada cun n gran intervënt dal portier todësch. Sön la rebatöda él Mersa che tira sura fora. Al 91^ él spo ciamó Barbolini che á na ocajiun de cé do na trata dal ciantun, mo l’ palé vá dlungia porta ia. Y insciö él incé la partida che se röva, do 3 menüc de recuper, sön l’ resultat de 0-2. L’ ACD Val Badia stlüj jö na sajun deludënta cun püc punti y partides sogades dër mal. Speran che la proscima sajun jarais damí, se stlü jö la sajun dl’ palé 2021-22.
N gran dilan vá ai sponsor che á daidé l’ ACD Val Badia economicamënter intratan chësta sajun y che è tres restá fedei a la scuadra ladina. N gran dilan vá incé ai dui alenadus Gianni Crepaz y Paolo Adami che á porté la scuadra fora por chësta sajun.

ACD Val Badia - ASD Pfalzen:  0 - 2

Formaziun ACD Val Badia: 1. Ferdigg Rene, 2. Ploner Matteo, 3. Kastlunger Mattia (dal 79^ 15. Graffonara Simon), 4. Valentini Luca, 5. Fersuoch Kevin, 6. Barbolini Florian, 7. Mayr Marc (dal 71^ 17. Mersa Elia), 8. Stampfer Alex, 9. Pizzinini Luca (dal 71^ 18. Pizzinini David), 10. Del Negro Roberto (dal 82^ 16. Ploner Alexander), 11. Dallapiazza Simone (dal 46^ 13. Conrater Heinrich).

Alenadú: Crepaz Gianni

N pêr de sponsor dl’ ACD Val Badia.

Dan l’ ultima partida de campionat él gnü soghé na partida danter sponsor dl’ ACD Val Badia.