Sabda, 10. aurì 2022

Degöna poscibilité

Sön l ciamp dal palé da Toblach él gnü soghé la partida de campionat danter l’ AFC Sexten y l’ ACD Val Badia. Le resultat baia tlêr.

Te n domisdé d’ aisciöda él gnü soghé sön l’ ciamp dal palé da Toblach la partida de 2^ categoria danter l’ AFC Sexten y l’ ACD Val Badia. La partida è gnüda sogada sön l’ ciamp da Toblach deach l’ ciamp da Sest è ciamó plëgn de nëi y massa mol.
La partida mët man y bel dô 10 menüc él l’ Sexten che passa in vantaje. L’ aversar, che á driblé l defensur, röia dan porta olache Ferdigg ne pó plü fá nia. Y 2 menüc dedô, al 12^, dal bel ca l’ 2-0 por la scuadra todëscia. Dô che l’ Sexten röva sön la fascia él n sogadú che lasciá pié ia na bela passada ite amez t’ area olache l’ atacant aversar, bel sú, mëss ma plü sburlé l’ palé te porta. La partida mët man "dër bun" por i ladins, che è bel dô 12 menüc zoruch de 2 goi. Al 34^ él indô l’ Sexten che á na gran ocajiun: Ferdigg prô da gni fora dan l’ atacant a ti stlü la visuala, mo l’ palé vá inant y passa dan la porta öta ia cina che Fersuoch la tira demez y salva la scuadra ladina dan da l’ terzo gol. Mo al è damí nia baié massa adora, deache 3 menüc dedô, al 37^, él i todësc che se porta sön l’ 3-0. Dô che l’ arbiter ti á conzedü na trata de puniziun al’ Sexten, él n sogadú aversar che lascia pié ia na gran trata che vá amesa i sogadus fora y ite te porta. Y chësc gol è ince l’ ultima aziun dl’ pröm tëmp che se röia al’ 45^ sënza recuper.
L’ secundo tëmp mët indô man cun na ocajiun por l’ Sexten, al 60^, cun na gran trata che è destinada a jí te porta. Mo te chël momënt él Ferdigg che se sciüra y deviëia l’ palé sura porta fora. Na gran parada. Mo döt por nia! Al 63^ él l’ Sexten che se porta sön l’ 4-0 cun na gran trata bassa diagonala dl’ atacant todësch che vá te porta y ne ti lascia degöna poscibilité a Ferdigg. La scuadra ladina è a tera y ne sá nia plü ci fá. Y insciö garetl al 71^ incé l’ cuinto gol por la scuadra da Sest. 3 menüc dedô él indo la scuadra de ciasa sö dant: dô che l’ atacant ciafá l’ palé söl pé prôl la trata, mo l’ palé vá a sbaté cuntra l’ pé de porta. Dô chësta aziun ne sozedl nia plü tröp y al 92^, dô 2 menüc de recuper, él l’ arbiter che sciüra la fin dla partida. Na partida che è stada dominada por düc i 90 menüc da öna na scuadra che á demostré da avëi plü vëia y incé plü cualité. Sce Ferdigg ne és nia salvé n per de bi tentatifs, es le resultat podü ester ciamó plü devastant.

AFC Sexten - ACD Val Badia: 5 - 0

Formaziun ACD Val Badia: 1. Ferdigg Rene, 2. Mayr Marc (dal 69^ 14. Conrater Heinrich), 3. Kastlunger Mattia (dal 80^ 16. Mersa Elia), 4. Crepaz Luca (dal 46^ 17. Dallapiazza Simone), 5. Fersuoch Kevin, 6. Barbolini Florian, 7. Valentini Luca, 8. Stampfer Alex, 9. Pizzinini Luca, 10. Denicolo Davide (dal 46^ 15. Del Negro Roberto), 11. Ploner Alexander (dal 46^ 18. Pizzinini David).

Alenadú: Crepaz Gianni.

Proscima partida: La proscima partida vëgn sogada proscima sabeda, ai 16 de aurí, dales 16:00 cuntra l’ San Laurenz sön l’ ciamp dal palé da La Ila.