Sabda, 26. merz 2022

L’ impëgn è, mo l’ resultat nia

Dô na prestaziun cun impëgn ne ti è l’ ACD Val Badia impó nia da porté a ciasa punc y perd la terza partida de fila do la pausa invernala.

Te n bel domisdé d’ aisciöda él gnü soghé dales 15:00 sön l’ ciamp dal palé da Terenten la partida de campionat danter l’ ASV Terenten y l’ ACD Val Badia cun la scuadra ladina che ne ti è nia stada buna da porté punc a ciasa y á insciö pordü 4-1 cuntra la scuadra de ciasa.
La partida mët man cun l’ Terenten che vá atira in vantaje al 7^ cun n aziun asvelta che á taié fora la defenjiun y á fat rové l’ palé te porta. Te chësta aziun che á porté inant l’ Terenten él la defenjiun ladina che ne á nia metü dër averda. 1-0. Al 14^ él indô la scuadra todëscia che atachëia y röva dan porta cun n cross bass, mo ite amez ne él degügn che abina l’ palé y insciö val fora de ciamp. Al 15^ él l’ Terenten che á la proscima ocajiun cun na trata de puniziun che vá de dër püch sura porta fora. Al 27^ ti è la scuadra ladina da se porté sön l’ pêr: Valentini lascia pié ia na trata violënta, da 30 metri de distanza, che vá te porta por l’ 1-1. Mo 2 menüc dedô, al 29^, él bel indô l’ resultat che cambia: do da n cross dal limit dl’ area él n sogadú aversar che salta sö de cé y tira l’ palé te porta por l’ 2-1. Al 35^ él indo l’ Terenten che á l’ enejima ocajiun por passé in vantaje, mo la trata dal limit vá dlungia porta ia. Al 44^ dal spo ca l’ 3-1: sön na passada alta él la defenjiun ladina che sbalia y l’ palé röva cuntra porta, olache Erlacher pro ciamó dal paré demez mo al ne è plü nia da salvé. Al 46^, do da 1 n menüt de recuper, él l’ arbiter che sciüra la fin dl pröm tëmp.
L’ secundo tëmp mët indô man cun na ocajiun por l’ Terenten cun n cross dala fascia ciampa, olache n sogadú prô spo la trata cun l’ palé che vá de püch sura fora. Al 63^ él Pizzinini L. che pëia ia dal zënter dl’ ciamp cun na gran aziun personala y do avëi driblé trëi aversars prôl la trata mo l’ portier para. Al 66^ él ciamó na ocajiun por l’ ACD Val Badia cun Stampfer che mët n bel cross te area olache degügn ne ti è bugn da trá te porta y insciö svanësc incé chësta ocajiun. Al 72^ él spo indo i padruns de ciasa che se lascia udëi cun na trata de puniziun da 30 metri: la trata vá de püch dlungia porta ia. N menüt dedô, al 73^, garetl spo l’ 4-1 por la scuadra todëscia: dô na trata dal ciantun él l’ palé che vá a sbaté cuntra la traversa, dan che n sogadú dl Terenten l’ abina y tira te porta. Ti ultims 17 menüc ne suzedl nia plü tröp apert n pêr d’ aziuns dla Val Badia che ne porta nia al gol. Al 94^, do 4 menüc de recuper, él spo l’ arbiter che sciüra la fin dla partida cun na davagnada tlera dl’ Terenten. Mo incé sce l’ resultat pê dër tlêr, an impó udü n gran impëgn da pert dla scuadra ladina.

ASV Terenten - ACD Val Badia:  4 - 1

Formaziun ACD Val Badia: 1. Erlacher Giovanni, 2. Ploner Matteo, 3. Kastlunger Mattia, 4. Graffonara Simon (dal 89^ 13. Crepaz Luca), 5. Fersuoch Kevin, 6. Barbolini Florian, 7. Ploner Alexander, 8. Stampfer Alex, 9. Pizzinini Luca, 10. Valentini Luca, 11. Dallapiazza Simone (dal 65^ 14. Pizzinini David).

Alenadú: Crepaz Gianni

Proscima partida: La proscima partida vëgn sogada proscima domënia, ai 3 de aurí, dales 16:00 cuntra le Mühlwald sön l ciamp dal palé da La Ila.