Domënia, 15. setëmber 2019

Na bela devënta

La bona scuadra di ghesc, pro les mius sön la cherta, fajo tëma ai sogadus de ciasa y do en pröm tëmp combatü va la Val Badia cun en gol de svantaje tla palsa. Tl secundo tëmp é bugn i sogadus ladins a giré na partida cun 45 menüc sogá cun gran determinaziun, portan le resultat a en tler 3 a 1. Na devënta che fej dër bun al moral.

Ti pröms menüc mët man le Steinhaus cun tröp jüch y bí cambi de fascia, mostran atira la buna qualité di sogadus. La Val Badia defën naota y ne lascia nia ruvé i averars te area. Ince sce l’druch vëgn fat dai ghesc, röva i patruns de ciasa ala pröma ocajiun cun na trata de Simone al 15’ menüt che vëgn rebatöda dal portier Abfalterer. Püch do è n defensur dl Steinhaus che anticipëia de püch Matthias sön en bel cross, salvan insciö le resultat. Al 22’ menüt röva i ghesc ince a n ocajiun te area dla Val Badia, cun en per de trates che vëgn tres architades dai defensurs ladins. Dopo vëgn impegné le portier ladin ciamó da en per de trates da dalunc. Al 37’ röva en atacant aversar ia por tera sön en fal de Barbolini te area. L’arbiter mostra i önescmetri che l’atacant Zimmerhofer fej ite por l’0 a 1. L’resultat tëgn fina ala fin dl pröm tëmp.
Tl secundo tëmp suzedl püch fina che la Val Badia mët man a ciafé coraje y cambié n pü les posiziuns por jí a chirí l’per. Al 22’ menüt vëgn aziche Simone te area aversaria y toma, mo l’arbiter ne conzed nia l’önescmetri. 2 menüc dedo röva na bela trata de "Matthi" sön la stangia de porta, la cogora che vëgn zoruch vëgn spo drucada ite de cé da Gianluca por le 1 a 1 merité. Le per ti dá na gran sbürla ai ladins che röva a de bunes ocajiuns vigni per de menüc. 79’ menüt de jüch do n gran passaggio de Enrico, röva Simone sú dan l’portier y l’passa cun en bel pallonetto pur l’2 a 1. Ti ultimi 10 menüc lascia i ghesc döt davert por i atacanc de ciasa che podess stlü jö la partida te deplü ocajiuns. La plü bela al 87’ menüc cun en "miracolo" dl portier aversar che deviëia te ciantun la trata sigüda de Enrico da 2 metri. Al 94’ röva indo Enrico sú dan le portier. En chësc iade röva la trata te porta pur l’gol dl 3 a 1 che stlüj jö la partida. Grana é ligrëza por i sogadus de ciasa por na buna prestaziun, suradöt tl secundo tëmp, che á porté ince sü früc, rovan a na devënta chirida y meritada.

ACD Val Badia - SSV Steinhaus:  3 - 1

Formaziun dla Val Badia: 1. Denis Frenademetz, 2. Christian Azzolini (86. Simon Erlacher), 3. Matteo Ploner (70. Roberto Del Negro), 4. Gianluca Lorenzini, 5. Kevin Fersuoch, 6. Florian Barbolini, 7. Simone Masoch, 8. Alessandro Da Roit, 9. Mattia Kastlunger, 10. Matthias Stampfer (73. Fabian Dalpiano), 11. Enrico Farenzena.

Alenadú: Cristian Curti.

Goi por la Val Badia: 69’ Gianluca Lorenzini, 79’ Simone Masoch, 94’ Enrico Farenzena.