Domënia, 29. aurì 2018

La scuadra é viva y la speranza de podei resté te 2a. categoria vîr inant

Cun la secunda deventa indolater tegn la Val Badia ciamò via la speranza de podei resté inant te 2a. categoria. La gara mess gní fata sön le terz ultimo post, chel tut ite atualmenter dal Rina. Chisc à begn cater punc deplú, che ne nia püch. Mo la scuadra é viva y ara ó trá fora döt tles ultimes partides. Sambegn che chan ché an mess soghè por davagné, se complicheia tröpes coses senza scemples. Oramai sciöche "tradiziun" sa ince prejenté la VB cun na formaziun atramenter te ciamp cuntra le Taisten. Te chesta partida à döt paisené bun, la veia, l agresivité y ince le jüch. Le gol dl vantaje
atira é sté de gran aiüt. Da n ultima odon ince les tröpes gran ocajiuns él na deventa meritada. I aversars á la medema motivaziun y sön le ciamp de ciasa esi ince gonot stá bugn mët in dificolté en gröm de scuadres.

Al 4^ menüt röia da na pert jö Fontanive che salta le aversâr y crossei t'aria. Püch dan le secundo pé röia anter dui defensurs pustri ite Clara ala deviaziun de ce te porta. Chesta ne vegn nia abinada dal portier che ne sá nia der capí cun sú defensurs. Al 9^ de jüch tira le sis Plankensteiner na lungia rometöda prigorosa cun les mans cuntra porta. Ferdigg mess se alzé de n der toch devian sura stagia fora. Do da 17^ menüc para ia por tera le un ladin na rodada t' aria dl nú Burger. Impormó dedo ti scürel à chesc na posiziun de fora dl jüch. En pü na spordöda se ciafun ince al 29^ de jüch chanche Olex Stampfer se ciafa na palonada tla müsa, mo al pó soghè inant. Do da 33^ menüc röia na pasaja de "Matti" Stampfer t' aria por Clara che sú tira fora de porta da na buna posiziun. Al 54ejim do avei taié fora i defensurs passa Clara al capitan ladin che röia bel sú dan Laner. Süa trata ciafa na gran rebatöda dal portier. Do da 56^ menüc fej Felder en sech fal püch dan aria y se ciafa la ghela. La puniziun dl önesc puster roda do mür ite y vegn bun parada dal un dla VB. Al 72^ de jüch sön na crossada dan porta devieia le sterch Feichter de ce te porta. Ferdigg à na gran reaziun rebaton demez la gran trata. Al 78^ menüt röia t' aria Zuliani sön na bela passada de "Duz", le cater Peintner le contrasteia y al toma. Le banch dla VB protesteia odon en önescmetri. Do da 82^ de jüch röia da na pert jö y ite t' aria Fontanive che vegn fat tome dal chinesc Gitzl. Ghela y önescmetri por la VB. Crazzolara le tira sech sön la man derta dl verdaporta por le merité 2 a 0. En pü protesté vegnel ince da pert tl Tasten al 86ejim sön en contrast danter Vittur y L.Burger t'aria, mo le bun arbiter ne tol degöna decijiun. Al 87^ menüt röia Zuliani bel sú dan porta pustra y tira, cun na gran rebatöda Laner salva süa scuadra dal terzo gol.
Sambegn grana la ligreza tles lignes dla VB y por le alenadú Curti che pó se tó finalmenter val sodesfaziun. Cun la medema mentalité saral da jí à soghè le derby cuntra La Val, speran tla terza deventa indolater. La sora direziun por podei speré inant tla salveza.

ACD Val Badia - ASD Taisten:  2 - 0

Formaziun dla Val Badia: 1.Rene Ferdigg, 2.Andrea Conrater, 3.Mattia Kastlunger, 4.Alexander Ploner, 5.Samuel Vittur, 6.Florian Barbolini, 7.Alex Felder, 8.Alex Stampfer, 9.Davide Fontanive, 10.Matthias Stampfer (capitan) (dal 64^ Nicola Zuliani), 11.Manuel Clara (dal 68^ Miguel Crazzolara).

Alenadù: Cristian Curti.

Goi por la Val Badia: 4^ Manuel Clara, 82^ Miguel Crazzolara (sön önescmetri).

Proscima partida:  en domenia, ai 6 d' má 2018 dales 16.00 sön la plaza "Plans" da La Val l' derby cuntra La Val.