Ala fin de lugio dl 2003 ele le ciamp dl sport da La Ila  gnü curì cun en erba sintetica. Al è stè un di prüms ciamps da soghè al palon dla provincia de Balsan che à ciafè en erba sintetica. Chësc fo y è por nos tres sciamò en gran aiüt deache al se permët da soghè ince ite por l’altonn y da d’ainsciüda adora. Dal momënt che nosc ciamp è  a 1.500 m  de altëza  y che le program di campionac stabilì dales federaziuns (FIGC y VSS)  se oblighëia a soghè dandaldüt da d’altonn y da d’ainsciüda unse bele punsè da realisè tl 2003 en ciamp cun erba artifiziala. Chësc ciamp sintetich è stè dër ütl deache al se à pormetü da soghè dütes les partides y dandaldüt düc i alenamënc con vigni tëmp sënza rovinè le ciamp sciöche al è suzedü dal 1978 fina al 2003.
Tres la Figc mëss chësta erba sintetica gnì omologada vigni 4 agn (inlaota vigni 2 agn) por podëi soghè partides ofiziales. Tl ann 2014 ele le ciamp ma plö gnü omologhè por un en ann y do avëi damanè na deroga, che è gnüda conzedüda, un ciamò podü soghè fina al 2017 ruvan a en punto che sun stà obligà a to fora la vedla erba artifiziala y la baratè fora con na erba sintetica nöia por podëi jì inant con nosta ativitè.

Con en gran finanziamënt da pert dl comun de Badia che à capì la situaziun y con gran sensibilitè te cunfrunt dl US Alta Badia ince giulan a nosta gran ativitè sun stà bogn da fa piè ia chësc gran proiet de realisaziun de na erba sintetica nöia de ultima generaziun.

Dal momënt che ince te chësc cajo la FIGC scrì dant tröpes condiziuns unse messü tignì cunt de dütes chëstes. La FIGC pertënd che al vëgnes elaborè en proiet che vëgn menè a Roma por l’aprovaziun. Laprò esun obligà a fa en implant de irigaziun y ince na canaleta incër düt le ciamp olache l’ega po jì ite y sen jì demez. Laprò omologhëia la FIGC ince la composiziun dl material sot l’erba sintetica alado sciöche ai la scrì dant y chësc se à portè a messëi fa ince en gran intervënt sön le vedl ciamp do avëi tut fora l’erba artifiziala vedla. Do düta chësta prozedüra vëgnel ala fin metü jö l’erba sintetica (6 cm alta) nöia olache al vëgn metü ite 1cm de saurun al quarz por tignì jö l‘erba y sciöche ultimo ele da mët 4,5 cm de granulat sintetich lassura.

Por le proiet y la direziun di laurs è gnü inciariè l’injinier Stefan Marcher che à dejmostrè gran competënza y impëgn. Do l’aprovaziun dl proiet da pert dla FIGC à le Comun de Badia scrit fora i laurs por en import de 498.000 euro de laurs plö ca 100.000 de spëises de aministraziun (Iva, Irpef, proiet,omologaziuns i.i.i. ).

Cinch dites a tut pert al’apalt. Ciafè i laurs à la firma Italgreen da Villa d’Adda - Bergamo che à ofrì na riduziun dl 22% sön le capitolato. La Italgreen è la firma che realisëia plö ciamps sintetiche tla Talia con na gran esperiënza sön chësc ciamp.

I laurs è gnüs scomencià ai 21 de agost 2017 y messa durè do le program preodü fina al 31 de otober (70 dis). Chisc laurs è jüs bun inant fina che al gnü la nëi che à blochè la realisaziun a püc dis dala fin (ala fin mancel ca en edema de laur).

Sëgn messun aspetè al’ainsciüda por ruvè ia i laurs y podëi se la confortè düc canc a soghè söl ciamp nü che a dejferënzia dl vedl sarà tröp plö sann che è la cosa plö bela y importanta por düc nösc jogn.

En gran ringraziamënt ti va al Comun de Badia, al umbolt Jaco Frenademez, al asessur al sport Elmar Castlunger, ala la Giunta de Comun y al Consëi.