Sabda, 15. otober 2016

Na Val Badia desfortunada pert sön le rî ćiamp da Sest

La partida é stada sogada la sabeda sёra dales sis sön na plaza valgamia mola y cun l' erba che tachâ dër sot i ćialzà da soghè. An savô che Le Sest é na buna scuadra y che suradöt te ćiasa se fejera respeté. Le alenadú Folchi mët tles parores che la VB des fá le jüch y nia le subí da pert di aversârs. Chësc né nia sté meso da fá tresfora. I önesc dla VB à inće tröpes plú dificultes da sté en pé cho chi de ćiasa. Döt adöm él sté na bela partida da trames les perts. La VB é stada valgamia desfortunada sön les aziuns di dui goi, spó sön la fin dla partida à inće le arogant arbiter laoré tröp de cuntra.

Al 11^ menüt atoca n' atacant dl Sest le pé de porta bass sön la man ćiampa de Ferdigg. Al 26^ él n slalom de Crazzolara che tira t' aria te porta le un robat de pé. Do da 42^ de jüch él deplú trates cuntra la porta ladina rebatödes, sön öna él na deviaziun de Vittur che atoca la stangia de porta sot sö y röia fora. Chiló à daidé la förtüna. Al 56^ menüt sön na trata de ćiantun de H.Conrater röia la gran deviaziun de ce Crazzolara, le curan röia fora de püch bass dlungia le pé. Al 63^ sön na trata de punziun él na deviaziun de ce te porta parada saurí da Ferdigg. En menüt dedô él en slalom dl capitan ladin dan aria pustra cun trata. Le un dl Sest para ia por tera te dui iadi. Por en fal fora dl' aria pustra ćiafa la VB na puniziun al 67ejim. La gran trata de Crazzolara röia püch sot l' incrujada di lëgns sön la man dërta de Patzleiner che jora devia da na pert fora te ćiantun. Na parada da aplausc. Al 70^ menüt sön n' aziun d' atach pustra röia na passada bassa dan porta cuntra en atacant. Vittur antizipëia le atacant devian bass te süa porta dlungia pé ite sön la man dërta de só portier. La desfortunada deviaziun porta al vantaje dl Sest te en bun momënt dla VB. Do da 75^ de jüch röia na passada lungia t' aria al sú nü H.Happacher te na tlera posiziun de fora dl jüch. Al lascia pié ia na trat bassa sön le secundo pé de porta che porta al 2 a 0. Deplú sogadus ladins protestëia cuntra le arbiter che ne anulëia nia le gol. Sön spligaziuns sön la regola dl "fora dl jüch" se ćiafa Adami la cherta chöcena y vëgn desgort. Na decijiun sura fora. La VB se prô inće inant en diesc y sön na bela aziun atoca Matti Stampfer le pé de porta sön la man ćiampa dl bun un puster al 80^ de jüch. Cater menüć dedô vëgn fat tomé "Matti" sön en contrast püch dan aria da dui defensurs dl Sest. Le arbiter dër nervus scura en fal de cuntra la VB. Chiló se scialda inće le acompagnadù M.Moscon che vëgn desgort.
Al 86^ menüt salta adöm a mesaciamp cun i cês Lorenzini y le tredesc Bachmann, la pesso ti tocha al sogadù dla VB che à en gran tâi sön le ce. Do les lungies medicaziuns cun la condüta fora de ćiamp dl ferí, scüra le arogant arbiter la fin dla partida. Sce bëgn che al fala bëgn cater menüć plü le gran recuper. Al dij che al ne à assá y em plü dijel val parora dër vulghera cuntra i ladins. Les protestes vá inant inće dedô, le regolamënt é bëgn en ater. Mo la rajun pêl che ai aes tres i arbitri.

AFC Sexten - ACD Val Badia: 2 - 0

Formaziun dla Val Badia: 1.Rene Ferdigg, 2.Heinrich Conrater, 3.Florian Barbolini (dal 76^ Simon Erlacher), 4.Samuel Vittur, 5.Andrea Conrater, 6.Paolo Adami, 7.Alex Stampfer, 8.Alex Felder (dal 64^ Gianluca Lorenzini), 9.Gabriel Prada (dal 73^ Davide Denicoló), 10.Matthias Stampfer (capitan), 11.Miguel Crazzolara.

Alenadú: Maurizio Folchi.

Proscima partida:  en domënia ai 23 d' otober dales 15.30 sön la plaza "Pradel" da San Martin de Tor cuntra le Raiscia.