Jöbia, 02. jügn 2016

ACD Val Badia: ince la Copa Provinzia é süa!

Da püch é rovada la finala de Copa Provinzia, sogada la jöbia ai 2 de jügn a Vahrn cuntra la formaziun da Laag. Le gol de Emanuel Dorigo tl pröm tëmp é sté dezisif.
 

Incö ai 2 de jügn vá a piz por la scuadra dl ACD Val Badia na sajun dl palé da some. Do la promoziun te secunda categoria, arjunta bele dan valgönes edemes, él sëgn ince garaté la devënta dla Copa Provinzia, baton tla finala a Vahrn la formaziun da Laag. La dezijiun dla partida é bele tomada tl pröm tëmp, plü avisa al 15^ menüt, canche Emanuel Dorigo vá a rëi y porta en vantaje süa scuadra. Chësc n’ó nia dí che al ais mancé d’atres emoziuns, deache i aversars ne stê nia a ciaré pro. Le portier y alenadú Massa é sté dezisif te plü de öna na ocajiun cun de beles parades. Ti pröms menüc dl secundo tëmp ess i ladins albü l’ocajiun da radoplé, mo ara n’á nia orü ester. Te almanco döes ocajiuns é le palé ince jü toch dlungia stangia ia, n iade por öna, n iade por l’atra scuadra. Baldi él ince sozedü n inzidënt, a dann dl sogadu Altin Alla, che s’á fat me al ce y á messü gní condüt demez cun l’ambulanza. L’aodanza é che al ne sides nia de grave y che al pois tosc indô ester varí.
Insciö ti garetel ala Val Badia na sajun da record, cun devënta dopla tl campionat y tla Copa. A döta la scuadra cun l’alenadú i vál i complimënc por la gran prestaziun. (pablo)

ACD Val Badia - USD Laghetti:  1 - 0

Formaziun dla Val Badia: 1.)Luca Massa, 2.)Heinrich Conrater, 3.)Andrea Conrater, 4.)Alex Stampfer, 5.)Julian Bernardi, 6.)Paolo Adami, 7.)Alex Felder, 8.)Emanuel Dorigo (46. Altin Alla, 92. Giovanni Giaramita), 9.)Matthias Stampfer (94. Samuel Vittur), 10.)Armin Erlacher, 11.)Gabriel Prada (81. Andrea Pedevilla).

Alenadù: Luca Massa.

Gol pur la Val Badia: 15^ Emanuel Dorigo