|
Al Fascia me maiù onur sön ćiamp nü Do 20 agn dal ultimo tornè interladin à l'US Alta Badia invié adalerch les scuadres dles valades vijines por festejé le chertde seco d'ativité. Les partides é inće stades na buna ocajiun por invié ia na proa generala sön le ćiamp dal palè nü.
Iniann tómel le 25ejim aniversar dala fondaziun
dl'Uniun Sport Alta Badia y por festejé le bel evënt à la sozieté ponsè
da invié ia n'initiativa plajora, sambëgn a livel sportif. I
organisadus n'à nia ma orü limité i festejamënć a livel d'Alta Badia,
mo à tut l'ocajiun por invié adalerch inće i sportifs dles valades
vijines y insciö él gnü organisé n tornè danter le vals ladines. En
sabeda y en domënia, ai 9 y ai 10 d'agost, él gnü metü da jì le tornè
interladin, a chël che à tut pert les scuadres dl'Alta Badia I, Alta
Badia II, de Gherdëina, Fascia y Fodom, y la formaziun di Barantli.
Chësta ultima é tomada ite al ultimo momënt deache la scuadra da
Cortina à desdit püć dis dan le scomenciamënt dl tornè. La
manifestaziun ti é gnüda dedicada a Ulrich Irsara, che é gnü a manćè
dan da n ann y mez. Ulrich é stè por agn alalungia tles lignes dl'US
Alta Badia, tröc sogadus é passà te sües mans y à podü tó sö consëis y
se miorè tla tecnica dl palè. Al à fat da acompagnadù y é tresfora stè
a desposiziun canche ara s'à tratè da portè aiüt.
Partides por jì te finala
Les partides de cualificaziun à scomencè la sabeda domisdé, sön le
bel ćiamp nü pro chël che n valgügn dis denant êl gnü stlüt jö i laurs
de sistemaziun. Le pre de erba ê oramai desfat y le ćiamp ê te de
pescimes condiziuns. Insciö él gnü trat sö le grunt y gnü metü jö pre
sintetich. La pröma partida é gnüda śogada danter Fodom y la secunda
scuadra dl'Alta Badia, y s'à rové sön le resultat de 2 a 0. Spo i àra
tochè a Fascia y al'Alta Badia II; davagné à i fascian por 1 a 0. La
partida danter Fascia y Fodom é jüda fora sön le 1 a 0. Tl rode "B" à
śoghé i Barantli cuntra l'Alta Badia I, sciöche al ê prodü à davagné la
scuadra dl'Alta (por 4 a 1). Danter Gherdëina y i Barantli él gnü a
s'al dè na sorpreja nia aspetada: i Barantli à batü i gherdënes por n
gol a zero. Gherdëina à inće messü i la zede al'Alta Badia I por 0 a 1.
La tlassifica provisora à insciö odü le Fascia y l'Alta Badia al pröm
post de so rode, vignöna cun 6 punć, i secundi posć é gnüs tuć ite da
Fodom y dai Barantli cun 3 punć, iadô al terzo post s'à plazè l'Alta
Badia II y Gherdëin, intrames les scuadres zënza n punt.
Le dé dles gran finales
La domënia éra spo gnüda sceria, canche ara s'à tratè da defëne l'onur y porvè da s'assiguré la devënta dl tornè.
Gherdëina y l'Alta Badia II à śoghé por le cuinto y le sesto post, la
partida é jüda fora sön le resultat de 2 a 0 por i gherdënes. La picera
finala por le terzo y le cuarto post, śogada danter Fodom y la
formaziun di Barantli, é gnüda davagnada dai fodomi, che à fat scassè
dui iadi la rëi dl portier badiot.
L'ultima partida é dessigü stada la plü aspetada: la scuadra de ćiasa
dl'Alta Badia I à messü jì te ćiamp a se mosorè cuntra la formaziun
fasciana. Chësta ultima é jüda te ćiamp de jüch cun le pé dla favorida,
él pö inće la scuadra che śoga tla categoria plü alta danter chëres che
à tut pert al tornè a La Ila. La partida é stada dër combatüda, ala fin
di tëmp regolamentars à l'arbiter podü sciuré n pêr final cun n gol por
pert. Insciö é le jüch jü inant cun les trates dai önescmetri: do i
splundri te porta à la scuadra fasciana podü alzè i brac sciöche sëgn
de devënta: le Fascia à atochè cater iadi la porta, l'Alta Badia indere
dui.
La premiaziun amez ćiamp
Atira do le sciüre dla fin dla partida él gnü invié la premiaziun,
olache vigni scuadra à podü pié do na bela copa, metüda a desposiziun
dala Cassa dl Sparagn. Ala scuadra dl Gherdëina i gnarà menada do, dal
momënt che gnanca un n gherdëna ne s'à presentè ala premiaziun!
La vëdua de Ulrich Irsara y la fia à partì i pesć do che le presidënt
dl'Uniun Sport Alta Badia à saludé y ringrazié dötes les scuadres che à
tut pert al tornè danter les valades ladines, sporjonl'aodanza che la manifestaziun pois jì inant inće ti agn che à da gnì. ( sp) La Usc di Ladins - 16 de agost 2003
Qualificaziuns
| Gruppo A
| Gruppo B
| Fodom - Alta Badia II
| 2:0 | Barantli - Alta Badia I
| 1:4
| Fascia - Alta Badia II
| 1:0
| Gherdëina - Barantli
| 0:1
| Fascia - Fodom
| 1:0
| Gherdëina - Alta Badia I
| 0:1
| | | | | | 1. Fascia
| 6 punc
| 1. Alta Badia I
| 6 punc
| 2. Fodom
| 3 punc
| 2. Barantli
| 3 punc
| 3. Alta Badia II
| 0 punc
| 3. Gherdëina
| 0 punc
| | | | | | | | | | | Finales
| | | | | | Finale 5. y 6. post
| | Gherdëina - Alta Badia II
| 2:0
| Finale 3. y 4. post
| | Fodom - Barantli
| 2:0
| Finale 1. y 2. post
| | Fascia - Alta Badia I
| 1:1 (4:2 rigori)
| | | | | |
 Premiaziun cun i capitans de vigni scuadra |
Trofeo valades ladines 
